Keibir derekkózderdiń habarlaýynsha, «Jolaýshylar tasymaly» AQ-nyń «Ońtústik» óńirlik filialynda 2024–2025 jyldary kóleńkeli júk ainalymy shemasy anyqtalǵan, dep habarlaidy Dalanews.kz.
Málimetke sáikes, is QR Qylmystyq kodeksiniń 195-baby boiynsha tirkelgen. Alaida derekkózder bul iste sybailas jemqorlyq belgileri de bolýy múmkin ekenin alǵa tartady.
Tergeý nusqasyna sáikes, qyzmetkerler jolaýshylar poiyzdary arqyly júk tasymaldaý tarifterin negizsiz kóterip, qarajatty jeke esepshottarǵa aýdardy degen kúdikke ilingen. Aldyn ala málimet boiynsha, qatysýshylardyń biriniń shotyna 154 mln teńgeden astam qarjy túskeni anyqtalǵan. Sondai-aq derekkózder atalǵan bólimshede tsifrlandyrý júiesi uzaq ýaqyt boiy engizilmegenin atap ótedi.
Kompaniia ne deidi?
«Jolaýshylar tasymaly» AQ-nyń «Ońtústik» óńirlik bólimshesi bul jaǵdaiǵa qatysty resmi túsinikteme berdi.
Bólimshe málimetinshe, Astana qalasynyń mamandandyrylǵan tergeý sotynyń sanktsiiasy negizinde Kóliktegi politsiia departamentiniń qyzmetkerleri jedel-izdestirý sharalaryn júrgizip, Almaty-1 stantsiiasyndaǵy bagaj bóliminde tintý ótkizgen.
Barlyq protsessýaldyq áreketter beinetirkeý arqyly júzege asyrylǵan. Is-shara barysynda qyzmetkerlerden jaýap alynyp, qyzmettik qujattar men jabdyqtar tárkilengen. Qujatsyz rásimdelgen júk bólek bólmege jinalyp, mórlenip, quqyq qorǵaý organdarynyń tekserýine berilgen. Tekserý aiaqtalǵanǵa deiin júk berilmeidi jáne jóneltilmeidi.
Filialdyń habarlaýynsha, buǵan deiin ishki qyzmettik tekserý qorytyndysy boiynsha 2025 jylǵy 4 qyrkúiekte tártiptik sharalar qabyldanǵan. Nátijesinde Almaty-1 stantsiiasynyń bagaj bóliminiń bir qyzmetkerimen eńbek sharty senim joǵaltý negizinde buzylǵan. Sonymen qatar bagaj tasymalyn uiymdastyrý men baqylaýǵa jaýapty laýazymdy tulǵalarǵa qatysty tártiptik yqpal etý sharalary qoldanylǵan.
Osyndai jaǵdailardyń aldyn alý maqsatynda filial baqylaý sharalaryn kúsheitken. Atap aitqanda, Almaty-1 stantsiiasynyń bagaj bólimi aýmaǵyna bógde adamdardyń kirýi shektelgen.
2026 jylǵy 6 aqpannan bastap Almaty-1 stantsiiasynyń bagaj bólimi shtattyq rejimde jumys istep jatyr. «Jolaýshylar tasymaly» AQ óńirlik filialy tergeý organdaryna tolyq qoldaý kórsetip otyrǵanyn málimdedi.
Qosymsha aqparat tergeý áreketteri aiaqtalǵannan keiin beriledi.
