Basqosýǵa QR Parlamenti Májilisiniń jáne Ózbekstan Respýblikasy Joǵarǵy Májilisiniń depýtattary, kórshi eldiń Ministrler keńsesi Halyqaralyq bailanystar jáne shet memlekettermen dostyq bailanystar ornyqtyrý keńesiniń músheleri, Ózbekstannyń ziialy qaýym ókilderi jáne QR Sh.Shaiahmetov atyndaǵy ulttyq ǵylymi-praktikalyq ortalyǵynyń jetekshisi, oblystyq Qazaqstan halqy Assambleiasynyń ókilderi men oblystyq ózbek etnomádeni birlestiginiń músheleri qatysty.
Basqosýda alǵashqy bolyp sóz alǵan oblys ákimi Janseiit Qanseiituly Ózbekstannan kelgen qonaqtarǵa eki baýyrlas elder arasyndaǵy rýhani, mádeni, ekonomikalyq bailanystardyń nyǵaia túsetinin jetkizdi.
– Ejelden týystas qazaq pen ózbek jurty Turandy meken etip, qiynshylyqty da, qýanyshty da birge kórdi. Bizdiń tarihi taǵdyrymyz da, arman-muratymyz da ortaq. Týystyǵymyz til jaqyndyǵynan tamyr tartyp, dástúrimizben jalǵasyp, salt-sanamyzben qabysyp jatyr. Baýyrlas ózbek halqy irgeles jatqan qońsy ǵana emes, etjaqyn aǵaiyn halyq. Barshańyzǵa málim, sońǵy 1,5 jyldyń ishinde Qazaqstan men Ózbekstan arasynda dostyq bailanystar bekip, jańa deńgeige kóterildi. Temirjol tasymaly 44 paiyzǵa artyp, taýar ainalymy 2 milliard dollarǵa jetti. Táýelsizdik jyldarynda egizdiń syńaryndai bolǵan elderdiń basshylary talai tolymdy kezdesýler ótkizip, baýyrlastyqtyń bútindigin, kórshilik bailanystyń kemeldigin kórsetti. Qazaqstan men Ózbekstan arasyndaǵy mádeni-ekonomikalyq bailanystardy nyǵaitý Siz ben bizge júktelip otyrǵan asyl mindet. Osy oraida aldaǵy ýaqytta birlese atqaratyn aýqymdy is-sharalar jeterlik dep oilaimyn, – dedi Janseiit Túimebaev.
Túrkistan oblysy ákiminiń baspasóz qyzmeti
