باسقوسۋعا ق ر پارلامەنتى ءماجىلىسىنىڭ جانە وزبەكستان رەسپۋبليكاسى جوعارعى ءماجىلىسىنىڭ دەپۋتاتتارى، كورشى ەلدىڭ مينيسترلەر كەڭسەسى حالىقارالىق بايلانىستار جانە شەت مەملەكەتتەرمەن دوستىق بايلانىستار ورنىقتىرۋ كەڭەسىنىڭ مۇشەلەرى، وزبەكستاننىڭ زيالى قاۋىم وكىلدەرى جانە ق ر ش.شاياحمەتوۆ اتىنداعى ۇلتتىق عىلىمي-پراكتيكالىق ورتالىعىنىڭ جەتەكشىسى، وبلىستىق قازاقستان حالقى اسسامبلەياسىنىڭ وكىلدەرى مەن وبلىستىق وزبەك ەتنومادەني بىرلەستىگىنىڭ مۇشەلەرى قاتىستى.
باسقوسۋدا العاشقى بولىپ ءسوز العان وبلىس اكىمى جانسەيىت قانسەيىت ۇلى وزبەكستاننان كەلگەن قوناقتارعا ەكى باۋىرلاس ەلدەر اراسىنداعى رۋحاني، مادەني، ەكونوميكالىق بايلانىستاردىڭ نىعايا تۇسەتىنىن جەتكىزدى.
– ەجەلدەن تۋىستاس قازاق پەن وزبەك جۇرتى تۇراندى مەكەن ەتىپ، قيىنشىلىقتى دا، قۋانىشتى دا بىرگە كوردى. ءبىزدىڭ تاريحي تاعدىرىمىز دا، ارمان-مۇراتىمىز دا ورتاق. تۋىستىعىمىز ءتىل جاقىندىعىنان تامىر تارتىپ، داستۇرىمىزبەن جالعاسىپ، سالت-سانامىزبەن قابىسىپ جاتىر. باۋىرلاس وزبەك حالقى ىرگەلەس جاتقان قوڭسى عانا ەمەس، ەتجاقىن اعايىن حالىق. بارشاڭىزعا ءمالىم، سوڭعى 1،5 جىلدىڭ ىشىندە قازاقستان مەن وزبەكستان اراسىندا دوستىق بايلانىستار بەكىپ، جاڭا دەڭگەيگە كوتەرىلدى. تەمىرجول تاسىمالى 44 پايىزعا ارتىپ، تاۋار اينالىمى 2 ميلليارد دوللارعا جەتتى. تاۋەلسىزدىك جىلدارىندا ەگىزدىڭ سىڭارىنداي بولعان ەلدەردىڭ باسشىلارى تالاي تولىمدى كەزدەسۋلەر وتكىزىپ، باۋىرلاستىقتىڭ بۇتىندىگىن، كورشىلىك بايلانىستىڭ كەمەلدىگىن كورسەتتى. قازاقستان مەن وزبەكستان اراسىنداعى مادەني-ەكونوميكالىق بايلانىستاردى نىعايتۋ ءسىز بەن بىزگە جۇكتەلىپ وتىرعان اسىل مىندەت. وسى ورايدا الداعى ۋاقىتتا بىرلەسە اتقاراتىن اۋقىمدى ءىس-شارالار جەتەرلىك دەپ ويلايمىن، – دەدى جانسەيىت تۇيمەبايەۆ.
وزبەكستاننان كەلگەن دەلەگاسيا اتىنان وزبەكستان رەسپۋبليكاسى جوعارعى ءماجىلىسىنىڭ دەپۋتاتى راسۋل كۋشەربايەۆ وبلىس باسشىلىعىنا وزبەك حالقىنىڭ ۇلتتىق قۇندىلىقتارىن ۇلىقتاۋعا ارنالعان ايتۋلى شارانى قولعا الىپ جاتقانىنا العىس ءبىلدىردى. سونداي-اق، قازاقستان وزبەكتەرىنىڭ «دوستىق» قاۋىمداستىعى وبلىس اكىمى جانسەيىت قانسەيىتۇلىن «قوعام بەلسەندىسى» توسبەلگىسىمەن ماراپاتتادى. باۋىرلاس ەلدەن كەلگەن قوناقتارعا سىي-سىياپات كورسەتىلىپ، ەستەلىك سىيلىقتار تابىستالدى.
تۇركىستان وبلىسى اكىمىنىڭ باسپا ءسوز قىزمەتى
