– Ordabasy – «Aqtaban shubyryndy, Alqakól sulamadan» keıin qazaq halqy qaıta eńsesin tiktep, «bir jeńnen qol, bir jaǵadan bas shyǵaryp», jaýǵa qarsy attanǵan jeri. Ordabasydaǵy Birliktóbe HVİİİ ǵasyrda úsh bıdiń bastamasymen úsh júzdiń bekteriniń, ıgi jaqsylarynyń, batyrlary men sarbazdarynyń basy qosylyp, jońǵar shapqynshylaryna qarsy kúsh biriktirýge úndegen jer. Sondaı-aq, osy qasıetti jerde keler jyly 28 mamyrda Elbasy Nursultan Nazarbaevtyń Ordabasy taýynyń bıiginde baıandama jasaǵanyna 25 jyl tolady. Bul tarıhı data. Ol jerde stellalar tur. Meniń usynysym, tóbeniń basyna Alashtyń basyn qosqan úsh bı – Tóle, Qazybek jáne Áıteke bılerdiń eskertkishin ornatsaq, tamyry tereń Qazaq tarıhyna jasalǵan qundy jádigerlerdiń biri bolar edi, – dedi ákim.
Búginde osynaý eskertkishtiń arhıtektýralyq jumystary jasalynyp jatqanyn aıtqan óńir basshysy onyń bıiktigi 15-20 metr bolý qajet ekenin jetkizdi. Sondaı-aq, 1 myń gektar aýmaqty alyp jatqan qasterli jerdiń kire berisine joldar men demalys oryndary, dámhanalar salynatynyn atap ótti.
Sonymen birge, ákim Elbasynyń «Bolashaqqa baǵdar: rýhanı jańǵyrý» baǵdarlamalyq maqalasynda aıtylǵan tarıhta túrli ról atqarǵan qasıetti oryndardy qolǵa alyp, ony damytý arqyly keleshek urpaqtyń boıyna sińirý jáne sonyń aıasynda otandyq týrızmdi de damytý baǵytyndaǵy birqatar jobalarymen bólisti.
Aıta keteıik, 1993 jyldyń 26, 27, 28 mamyr kúnderi Ordabasynyń ushar bıigindegi Birliktóbede (qazirgi Týtóbe) úsh júzdiń basy qosylǵan Tóle, Qazybek jáne Áıteke bılerdi - jaýǵa qarsy birigip, keńes qurǵan babalarymyzdy eske alýǵa arnalǵan uly basqosý ótkizilgen-di. 150 myńnan asa adam qatysqan bul jıynǵa baýyrlas elder - Ózbekstan men Qyrǵyzstan memleketteriniń sol kezdegi basshylary Islam Karımov pen Asqar Aqaev mártebeli meıman retinde kelgen bolatyn.
OQO ákiminiń baspasóz qyzmeti
