Kún tártibinde tasqyn sýlardy saqtaý, jınaqtaý jáne taratýdyń gıdrotehnıkalyq qurylystaryndaǵy máseleler qaralyp, saladaǵy atqarylyp jatqan jumystar aıasynda oblystyq tótenshe jaǵdaılar departamentiniń bastyǵy Nurbolat Derbisov pen oblystyq aýyl sharýashylyǵy basqarmasy basshysynyń orynbasary Turǵanbek Ospanov baıandama jasady.
Jetekshiler aımaq basshysynyń sý tasqynynyń teris áserine jol bermeý, sondaı-aq, jınalǵan sýdy keıinnen sýǵarýǵa paıdalaný boıynsha sý qoıma salýǵa bolatyn jerlerdi anyqtaý tapsyrmasyna oraı, Ońtústikte jańadan jobalyq syıymdylyǵy 320,5 mln. sharshy tekshe metrdi quraıtyn 16 saqtaý ornyn salýǵa bolatynyn aıtty. Atalǵan nysandar iske qosylǵanda oblysta 17 myń ga sýarmaly jer jańadan aınalymǵa qosylady eken.
Keltirilgen málimetterdi muqıat tyńdaǵan J.Túımebaev jańadan salýǵa bolatyn 16 sý qoımasynyń 3 mln. halqy bar óńir úshin tym az ekenin aıtyp, jalpy jumysty synǵa aldy. Bul rette, aımaq basshysy kórshiles Jambyl oblysynda 141 sý qoımasynyń bar ekenin alǵa tartty.
− Kórshiles oblyspen salystyrǵanda bizdiń óńir halqynyń sany 3 ese kóp, biraq, sý qoımalarynyń sany jaǵynan olardan 3 ese azbyz. Aýyl sharýashylyǵyna beıim óńirmiz deımiz. Túrli ónimderdi kóp shyǵaramyz. Nege osyny oılamadyńyzdar?! 43 sý qoımasyna jańadan salynatyn 16 nysandy qossaq, 59 bolady. Sonda da jartysyna da jetpeıin dep turmyz. Qalaı sonda? Esep-qısap qaıda? Jospar qaıda? 16 emes, bul keminde 56 bolý kerek. Aýdan, qala ákimderimen jeke sóılestim. Sizder bar bolǵany 1-2-eý shyǵady degen aýdandar 6-7 sý qoımasyn salýǵa usynys berip otyr. Bizdiń ákimdikke munan bólek, 40-50 joba daıyndaýdy tapsyramyn, − dedi ákim barlyq aýdan, qala ákimderine bergen tapsyrmasynda.
Jıynda J.Túımebaev orynbasary J.Bókenbaevqa oblystyń barlyq múmkindikterin zertteý arqyly qosymsha úlken sý qoımalarynyń qurylysyn júrgizý boıynsha usynystardy jınaqtap, Sý resýrstary komıtetine usynýdy júktedi. Sondaı-aq, búdjetten qurylysyn júrgizý múmkindigi bolmaǵan jaǵdaıda, jeke menshik áriptestigi aıasynda iske asyrýdy qolǵa alýdy tapsyrdy. Aıta ketý kerek, oblys aýmaǵynda 43 sý qoımasy ornalasqan.
OQO ákiminiń baspasóz qyzmeti
