«Paıdaly qazbalar – turaqty damý mánmátinindegi basty másele» taqyrybyn talqylaý barysynda mıneraldy resýrstar salasynyń belgili mamany, "Carrière","Ivan Peycheset Dolomieu" ǵylym akademıasy, Fransıa geologıalyq qaýymdastyǵynyń "Léon Bertrand" syılyǵynyń, Ǵylym akademıasy «Mıneralogıalyq qaýymdastyǵynyń» Schlumberger kompanıasynyń medaliniń ıegeri Jorj Kalas ınovasıalyq jasyl tehnologıalardy engizý – jahandyq ekologıalyq máseleni sheshýdiń birden-bir joly ekenin aıtty.
Ál-Farabı atyndaǵy QazUÝ basshylyǵymen kezdesýde geoenergetıka salasyndaǵy yntymaqtastyqty jalǵastyrý qarastyryldy. «Fransýz joǵary oqý oryndarynyń arasynda QazUÝ-dyń negizgi áriptesteriniń biri – Lotarıngıa ýnıversıteti. Qazaqstan-Fransýz «Geo-Energetıka» ǵylymı-aǵartýshylyq ortalyǵy bazasy kelisimi sheńberinde halyqaralyq deńgeıde zertteý jumystary júrgizilýde. Ýnıversıtetter mamandardy birlesip daıarlaý jáne ınovasıalyq ǵylymı-zertteý jobalaryn jandandyrý úshin óz kúshterin biriktirdi. Jemisti yntymaqtastyqtyń qorytyndysynyń biri – qos dıplom baǵdarlamasy», – dedi rektor Ǵalymqaıyr Mutanuly.
QazUÝ damytý jumystarynyń nátıjesin ekonomıkanyń naqty sektoryna engizýde. Ýnıversıtet ǵalymdary Aqtóbe men Shyǵys Qazaqstan oblystarynyń ónerkásiptik kompanıalarymen birlese jumys isteıdi. QazUÝ-dyń ǵylymı áleýeti Per jáne Marı Kúrı ýnıversıtetimen áriptestikti damytýǵa, álemniń aldyńǵy qatarly ýnıversıtetterimen yntymaqtastyq sheńberin keńeıtýge jol ashady.
Óz kezeginde, profesor Jorj Kalas birlesken ǵylymı-zertteýshilik jumystardy atqarýǵa qyzyǵýshylyq tanytty. Onyń oıynsha, Qazaqstan paıdaly qazbalarǵa baı úlken memleket bolýy qorshaǵan ortany qorǵaý máselelerin, geologıalyq jer qoınaýyn keńinen zertteýge múmkindik beredi.
Jorj Kalas: «Qazaqstan kóptegen fransýz kompanıalarynyń qyzyǵýshylyǵyn týdyrýda. Biz jańa tásilder men jasyl tehnologıalardy ónerkásipte, qoldanysta, menejment pen ónerkásipti uıymdastyrý barysynda paıdalaný prınsıpi boıynsha jumys isteıtin bıznes qaýymdastyqtardy tartýǵa múddelimiz. Jasyl tehnologıa – turaqty damýdyń qaǵıdasy – onyń irgetasy bolyp tabylatyn ınovasıa», – dedi.
Taraptar akademıalyq yntymaqtastyq pen jańartylatyn energıa salasyndaǵy bıznes qaýymdastyqtarǵa degen qyzyǵýshylyq deńgeıin arttyrýǵa daıyn ekenderin bildirdi. Kezdesýdiń sońynda ýnıversıtet basshylyǵy Jorj Kalasty «EKSPO-2017»-de kórsetiletin birlesken jobalarǵa qatysýǵa shaqyrdy.
