Ustazdardyń biliktiligine qatysty másele kótergen Memleket basshysy "pedagogikalyq joǵary oqý oryndarynyń akkreditatsiiasynyń jańa standartyn engizýdi" usynǵan edi.
Dalanews.kz osy rette atalǵan salanyń bel ortasynda júrgen sarapshylarmen pikirlesip, olardyń aldaǵy ózgeristerge qatysty kózqarasyn bildi.
Abai atyndaǵy QazUPÝ prorektory Aqtolqyn Qulsarievanyń atap ótkenindei, bilimge qatysty, ǵylymǵa qatysty aitylǵan nárseler árkezde mańyzdy, oryndy.
"Pedagogikalyq joǵary oqý oryndarynyń akkreditatsiiasynyń jańa standartynyń bolýy da bizge úlken jaýapkershilik júkteidi dep bilemin. Jáne de stýdentterdiń 80-90 paiyzy aýyldyq mekenderden keletin, shalǵai aýdandardan keletin joǵarǵy oqý orny retinde jataqhana máselesi de bizdiń sheshilmei júrgen máselelerdiń biri bolǵandyqtan, memleket pen jeke kásipkerliktiń birlese otyryp, osy máseleni sheshýin usynýy da óte mańyzdy. Jańa ekonomikalyq saiasat ta kóptegen bólikterden turady. Biraq eń basty aitaiyn degenim osylar", – deidi ol.
Óz kezeginde osy oqý ornyndaǵy Qazaqstan halqy Assambleiasy kafedrasynyń jetekshi mamany Gúlden Jasharalinanyń Prezident óz Joldaýynda kóptiń kókeiindegi máselelerdi qozǵaǵanyn tilge tiek etti.
"Ýniversitettiń muǵalimderin jáne de memlekettik mekemelerde jumys jasaityn pedagogtardyń 5 jyl saiyn emes, 3 jyl saiyn akkreditatsiialaý, iaǵni biliktiligin arttyrýyn jańartyp otyrý kerektigin kórsetken bolatyn.
Bul degenimiz memlekettegi jastarǵa, muǵalimderdiń jańa bilimdi ár jyl saiyn jańa túrde, jańa formada berýin qamtamasyz etýdiń anyq kórsetkishi dep aitsaq bolady.
Sonymen qatar balabaqshany da akkreditatsiialaý máselesine toqtalsaq, tek qana balabaqshany emes, sonyń ishinde tárbieshini jekelei akkreditatsiialaý máselesine de anyq túrde toqtalǵan bolatyn.
Osyndai Prezidentimiz Joldaýynda kórsetken, atap aitqan naqty jobalarynyń barlyǵy aldaǵy tańda bizdiń memleketimizdiń joǵary deńgeide ósip, jarqyn bolashaqqa jol ashatyndyǵyna senimimiz kámil", – deidi ol.
