Qaraǵandy oblysynyń Priozersk qalasynda 98 paiyz daiyn kúiindegi tazartý qurylystaryn rekonstrýktsiialaý jobasy 2017 jyldan bastap turalap tur. Bul týraly Joǵary aýditorlyq palatanyń sý burý salasynda júrgizgen memlekettik aýditi barysynda anyqtaldy, dep jazady Dalanews.kz.
Joǵary aýditorlyq palatanyń málimetinshe, atalǵan jobanyń quny 1,9 mlrd teńgeni quraidy.
Sondai-aq Túrkistan jáne Shyǵys Qazaqstan oblystarynda káriz jelileriniń bolmaýyna bailanysty 5,6 mlrd teńge somasyna paidalanýǵa berilgen tazartý stantsiialary boiynsha alty joba toqtap tur.
"Sý burý boiynsha 27 kúrdeli jobany saraptamadan ótkizýdi saraptama júrgizýge tiisti quqyǵy joq uiymdar júzege asyrǵan, bul zańnamaǵa qaishy keledi", delingen JAP habarlamasynda.
Óńirler arasynda qarajat bólýde teńgerimsizdik baiqalady. Mysaly, Qaraǵandy, Pavlodar, Ulytaý oblystarynda jelilerdiń tozý dárejesi joǵary bolýyna qaramastan, Astana qalasy, Túrkistan jáne Almaty oblystary kóp qarjylandyrylǵan.
"Túrkistan, Qaraǵandy oblystarynda, Shymkent pen Astanada 15 joba boiynsha iske asyrý merzimderi buzylǵan, al jekelegen jobalar boiynsha túzetilgen jobalyq qujattamaǵa qaita saraptama júrgizilmegen. Jalpy sý burý boiynsha 35 jobany iske asyrý quny túzetý nátijeleri boiynsha 109 mlrd teńgeden 180 mlrd teńgege, iaǵni 70 mlrd teńgege deiin ulǵaiǵan".
Respýblikanyń 67 qalasynda káriz tazartý stantsiialaryn jańadan salý, jańǵyrtý jáne rekonstrýktsiialaý kerek, al 27 qalada olar múldem joq.
Aýdit qorytyndysy boiynsha:
- barlyǵy 18,7 mlrd teńgege qarjylyq buzýshylyqtar anyqtaldy;
- biýdjet qarajatyn jáne aktivterin tiimsiz josparlaý – 23,4 mlrd teńge;
- olardy tiimsiz paidalaný – 26,7 mlrd teńge;
- yqtimal shyǵyndar men túspei qalǵan paida 17,3 mlrd teńgeni qurady;
- 59 júieli kemshilik jáne 277 rásimdik buzýshylyq anyqtaldy.
Olardy joiý jónindegi jumys tolyq aiaqtalǵanǵa deiin Joǵary aýditorlyq palatanyń baqylaýynda bolady.
"Tsifrlandyrýsyz, anyq aqparatsyz shyǵyndardy tiimdi josparlai almaisyzdar. Jaǵdaidy jalpy el boiynsha, óńirler bólinisinde jáne infraqurylym túrleri boiynsha tutastai kóre alý qajet. Eń mańyzdy máselelerdi birinshi kezekte sheshý kerek. Sapaly monitoring bolmasa, boljamǵa ǵana súienip áreket etesizder, iaǵni qai óńir birinshi kelse, sonymen jumys isteitin bolasyzdar. Bul durys emes jáne tiimsiz", — dedi Álihan Smaiylov Ónerkásip jáne qurylys ministrliginiń ókilderine.
