Qazaqstan Joǵarǵy soty Facebook paraqshasynda Resei prezidenti Vladimir Pýtindi synaǵan jazbalaryna bola "alaýyzdyq týdyrdy" dep aiyptalyp, úsh jylǵa sottalǵan belsendi Sanat Dosovtyń sot úkimine kassatsiialyq shaǵymyn qaraýdan bas tartty. Bul týraly Azattyqqa Dosovtyń áieli ári qorǵaýshysy Ásel Jumaǵazina habarlady.
Onyń aitýynsha, Joǵarǵy sottyń Dosovtyń shaǵymyn qaraýdan bas tartqany 4 mamyrda belgili bolǵan. Sol kúni Dosovtyń shaǵymyn aldyn ala qaraǵan joǵarǵy sottyń qylmystyq ister jónindegi sot alqysynyń sýdiasy Nuryshev buǵan deiingi sot sheshimderin qaita qaraýǵa negiz joq dep, shaǵymdy kassatsiialyq instantsiiada qaraýdan bas tartqan.
Aqtóbe oblystyq №2 soty 2016 jyly 27 jeltoqsanda Sanat Dosovty qylmystyq kodekstiń 174-babynyń 1-bólimi boiynsha ("áleýmettik, ulttyq, rýlyq, násildik, tektik-toptyq nemese dini alaýyzdyqty qozdyrý") aiypty dep tanyp, úsh jylǵa sottaǵan.
46 jastaǵy Sanat Dosov 2014 jyldyń shildesi men 2016 jyldyń naýryzy aralyǵynda jazǵan jazbalarynda Resei prezidentin "eldi qiratty" dep aiyptap, onyń saiasatyn jáne Kremldiń Shyǵys Ýkrainadaǵy áreketin synaǵan.
Derekkóz: Azattyq
