قازاقستان جوعارعى سوتى Facebook پاراقشاسىندا رەسەي پرەزيدەنتى ۆلاديمير ءپۋتيندى سىناعان جازبالارىنا بولا "الاۋىزدىق تۋدىردى" دەپ ايىپتالىپ، ءۇش جىلعا سوتتالعان بەلسەندى سانات دوسوۆتىڭ سوت ۇكىمىنە كاسساسيالىق شاعىمىن قاراۋدان باس تارتتى. بۇل تۋرالى ازاتتىققا دوسوۆتىڭ ايەلى ءارى قورعاۋشىسى اسەل جۇماعازينا حابارلادى.

ونىڭ ايتۋىنشا، جوعارعى سوتتىڭ دوسوۆتىڭ شاعىمىن قاراۋدان باس تارتقانى 4 مامىردا بەلگىلى بولعان. سول كۇنى دوسوۆتىڭ شاعىمىن الدىن الا قاراعان جوعارعى سوتتىڭ قىلمىستىق ىستەر جونىندەگى سوت القىسىنىڭ سۋدياسى نۇرىشيەۆ بۇعان دەيىنگى سوت شەشىمدەرىن قايتا قاراۋعا نەگىز جوق دەپ، شاعىمدى كاسساسيالىق ينستانسيادا قاراۋدان باس تارتقان.

اقتوبە وبلىستىق №2 سوتى 2016 جىلى 27 جەلتوقساندا سانات دوسوۆتى قىلمىستىق كودەكستىڭ 174-بابىنىڭ 1ء-بولىمى بويىنشا ("الەۋمەتتiك، ۇلتتىق، رۋلىق، ءناسiلدiك، تەكتىك-توپتىق نەمەسە دiني الاۋىزدىقتى قوزدىرۋ") ايىپتى دەپ تانىپ، ءۇش جىلعا سوتتاعان.

46 جاستاعى سانات دوسوۆ 2014 جىلدىڭ شىلدەسى مەن 2016 جىلدىڭ ناۋرىزى ارالىعىندا جازعان جازبالارىندا رەسەي پرەزيدەنتىن "ەلدى قيراتتى" دەپ ايىپتاپ، ونىڭ ساياساتىن جانە كرەملدىڭ شىعىس ۋكرايناداعى ارەكەتىن سىناعان.

دەرەككوز: ازاتتىق