Temirtaýda jekemenshik sektordaǵy 26 úi bir aptaǵa jýyq jylýsyz jáne sýsyz otyr. Apattan keiin jergilikti bilik turǵyndarǵa jylý jelisin qalpyna keltirýdiń ornyna gazǵa jedel qosylýdy usynyp, ony bes jylǵa paiyzsyz bólip tóleý tetigin jariialady, dep habarlaidy Dala news.
Qala ákimdiginiń málimetinshe, jylý trassasyn biýdjet esebinen jóndeý múmkin bolǵanymen, jeli ótetin jer telimi jekemenshikke tiesili. Qujat rásimdeý uzaqqa sozylatyndyqtan, bilik «eń jedel ári senimdi jol» retinde gazben jylytýǵa kóshýdi usynǵan. Aýdanǵa gaz qubyry tartylǵan, endi tek úilerdi qosý qajet.
Turǵyndarmen ótken kezdesýden keiin TKSh jańǵyrtý ortalyǵy arqyly kelisim bergenderge gazǵa qosylý shyǵynyn bes jylǵa paiyzsyz bólip tóleý usynylǵan. Alaida turǵyndardyń aitýynsha, bir úige shamamen 1 mln teńge shyǵyn shyǵady.
Apat ótken aptada 1-shi Koltsevaia kóshesindegi jylý magistralinde bolǵan. Turǵyndar aqaýdy óz kúshterimen jóndeýge tyrysqanymen, nátije bolmaǵan. Qazir olar balamasyz jaǵdaida gazǵa kóshýge májbúr.
Bul – biyl Temirtaýdaǵy alǵashqy tótenshe jaǵdai emes. Qaladaǵy tozǵan jylý jáne sý jelileri saldarynan ártúrli aýdandarda aiazdy kúnderi turǵyndar birneshe ret jylýsyz qalǵan. Infraqurylymnyń eskirýi máselesi taǵy da ótkir kóterilip otyr.
