Qazaqstanda mikroqarjy ombýdsman institýty engiziledi. Ol problemalyq shaǵyn nesielerdiń kóbeiýine bailanysty sotqa deiin máselelerdi sheshýde jeke tulǵalarǵa tegin qyzmet kórsetetin bolady. Bul týraly búgin Qarjy naryǵyn retteý jáne damytý agenttigi (QNRDA) málimdedi, dep habarlaidy Dalanews.kz.
Mikroqarjy ombýdsman institýty 2024 jyldyń 21 jeltoqsanynan bastap óz jumysyn bastaidy.
"Onyń negizgi maqsaty – azamattardyń quqyqtaryn qorǵaýdy qamtamasyz etý jáne daýlardy sotqa deiin jetkizbei retteýge kómektesý. Mikroqarjy ombýdsmany qazaqstandyqtardyń mikrokreditterge bailanysty daýlaryn, onyń ishinde merzimi ótken bereshekti retteý máselelerin jáne kollektorlyq agenttiktermen aradaǵy daý-sharǵylardy qarastyratyn bolady", delingen vedomstvo habarlamasynda.
Ombýdsmannyń qyzmetine mikroqarjy uiymdarynyń (MQU) klientteri – jeke tulǵalar ǵana júgine alady. Onyń qyzmetteri - tegin. Ol sotqa júginbesten janjaldardy sheshýge yqpal etetin táýelsiz tóreshi retinde áreket etedi.
"Ombýdsmannyń sheshimi qaryz alýshy qabyldaǵan jaǵdaida mikroqarjy uiymy úshin mindetti túrde oryndalýy tiis, al eger taraptar ózge merzim týraly ýaǵdalaspasa, 30 kún ishinde oryndalýy tiis", - deiji Qarjy naryǵyn retteý jáne damytý agenttigi.
Sondai-aq, vedomstvo mikroqarjy ombýdsmanynyń quzyretine sotqa berilgen nemese zańdy kúshine engen sot aktileri bar ister kirmeitinin naqtylaidy. Munymen qosa, dáleldenbegen mán-jailarmen nemese istiń jańa mán-jailary bolmaǵan kezde qaita jiberilgen ótinishter qaralmaidy.
Aita ketsek, 2024 jylǵy 1 qazandaǵy jaǵdai boiynsha Qazaqstanda 220 mikroqarjy uiymy, 215 kredittik seriktestik jáne 497 lombard jumys isteidi.
