2026 jyly «Kazakhmys Smelting» JSHS qurylymdyq bólimshesi – Jezqazǵan mys balqytý zaýyty 55 jyldyǵyn atap ótti, dep habarlaıdy Dalanews.kz.
Jarty ǵasyrdan astam ýaqyt ishinde kásiporyn kompanıanyń mańyzdy metalýrgıalyq aktıvteriniń birine jáne óńirdiń ónerkásiptik ortalyǵyna aınaldy. Búginde zaýyt qurylymyna tórt negizgi seh, segiz qosalqy bólimshe jáne mamandandyrylǵan qyzmet túrleri kiredi. Olar óndiristik úderistiń úzdiksiz jumysyn, ónerkásiptik qaýipsizdik standarttarynyń saqtalýyn, sondaı-aq ekologıalyq talaptyń oryndalýyn qamtamasyz etedi.
2026 jylǵy 9-20 aqpan aralyǵynda kásiporynda mereıtoıǵa oraılastyrylǵan sporttyq jáne saltanatty is-sharalar ótti. Eki apta boıy jumyskerler arasynda ujymdyq rýhty nyǵaıtý úshin merekelik baǵdarlamanyń bir bóligi retinde korporatıvtik sporttyq jarys uıymdastyryldy.
20 aqpanda óńirdiń mıneraldyq-shıkizattyq bazasyn damytýdyń negizin qalaǵan kórnekti ǵalym Qanysh Sátbaevtyń eskertkishine gúl shoqtaryn qoıý rásimi ótti. Al S.Qojamqulov atyndaǵy Jezqazǵan qazaq mýzykalyq-drama teatrynda sala ardagerleri men jumyskerlerge qurmet kórsetildi.
Qazaqmys korporasıasynyń Basqarma tóraǵasy Rýslan Óskenáli mys balqytý zaýytynyń ujymyn quttyqtap, eńbegi sińgen jumyskerlerdi marapattady.
Mereıtoı aıasynda 120 jumysker memlekettik, korporatıvtik jáne salalyq nagradalarǵa ıe boldy. Marapattalǵandardyń qatarynda Qazaqstan Respýblıkasynyń memlekettik nagradasyn ıelengender (8 adam), I, II jáne III dárejeli «Eńbek dańqy» tósbelgisin alǵandar (19 adam), sondaı-aq qurmet gramotalaryna ıe bolǵan qyzmetkerler bar. Budan bólek zaýyt jumyskerlerine alǵys hat, salalyq yntalandyrý syılyǵy, birqatar qyzmetkerlerge estelik syılyq tabystaldy.
Jezqazǵan mys balqytý zaýytynyń 55 jyldyq mereıtoıy – óndiristik júıeniń turaqtylyǵynyń, ujymnyń kásibı biliktiliginiń jáne kásiporynnyń taý-ken metalýrgıa salasyn damytý men Ulytaý oblysynyń áleýmettik-ekonomıkalyq ál-aýqatyna qosqan úlesiniń aıǵaǵy.
Kásiporyn jańǵyrtý baǵdarlamasyn júzege asyrýdy, óndiristik tıimdilikti arttyrýdy jáne eńbekti qorǵaý standarttaryn nyǵaıtýdy jalǵastyryp, Qazaqstandaǵy metalýrgıalyq óndiristiń kóshbasshylarynyń biri mártebesin saqtap keledi.
