2026 جىلى «Kazakhmys Smelting» ج ش س قۇرىلىمدىق بولىمشەسى – جەزقازعان مىس بالقىتۋ زاۋىتى 55 جىلدىعىن اتاپ ءوتتى، دەپ حابارلايدى Dalanews.kz.
جارتى عاسىردان استام ۋاقىت ىشىندە كاسىپورىن كومپانيانىڭ ماڭىزدى مەتاللۋرگيالىق اكتيۆتەرىنىڭ بىرىنە جانە ءوڭىردىڭ ونەركاسىپتىك ورتالىعىنا اينالدى. بۇگىندە زاۋىت قۇرىلىمىنا ءتورت نەگىزگى سەح، سەگىز قوسالقى بولىمشە جانە مامانداندىرىلعان قىزمەت تۇرلەرى كىرەدى. ولار وندىرىستىك ۇدەرىستىڭ ۇزدىكسىز جۇمىسىن، ونەركاسىپتىك قاۋىپسىزدىك ستاندارتتارىنىڭ ساقتالۋىن، سونداي-اق ەكولوگيالىق تالاپتىڭ ورىندالۋىن قامتاماسىز ەتەدى.
2026 جىلعى 9-20 اقپان ارالىعىندا كاسىپورىندا مەرەيتويعا ورايلاستىرىلعان سپورتتىق جانە سالتاناتتى ءىس-شارالار ءوتتى. ەكى اپتا بويى جۇمىسكەرلەر اراسىندا ۇجىمدىق رۋحتى نىعايتۋ ءۇشىن مەرەكەلىك باعدارلامانىڭ ءبىر بولىگى رەتىندە كورپوراتيۆتىك سپورتتىق جارىس ۇيىمداستىرىلدى.
20 اقپاندا ءوڭىردىڭ مينەرالدىق-شيكىزاتتىق بازاسىن دامىتۋدىڭ نەگىزىن قالاعان كورنەكتى عالىم قانىش ساتبايەۆتىڭ ەسكەرتكىشىنە گۇل شوقتارىن قويۋ ءراسىمى ءوتتى. ال س.قوجامقۇلوۆ اتىنداعى جەزقازعان قازاق مۋزىكالىق-دراما تەاترىندا سالا ارداگەرلەرى مەن جۇمىسكەرلەرگە قۇرمەت كورسەتىلدى.
قازاقمىس كورپوراسياسىنىڭ باسقارما ءتوراعاسى رۋسلان وسكەنالى مىس بالقىتۋ زاۋىتىنىڭ ۇجىمىن قۇتتىقتاپ، ەڭبەگى سىڭگەن جۇمىسكەرلەردى ماراپاتتادى.
مەرەيتوي اياسىندا 120 جۇمىسكەر مەملەكەتتىك، كورپوراتيۆتىك جانە سالالىق ناگرادالارعا يە بولدى. ماراپاتتالعانداردىڭ قاتارىندا قازاقستان رەسپۋبليكاسىنىڭ مەملەكەتتىك ناگراداسىن يەلەنگەندەر (8 ادام)، I، II جانە III دارەجەلى «ەڭبەك داڭقى» توسبەلگىسىن العاندار (19 ادام)، سونداي-اق قۇرمەت گراموتالارىنا يە بولعان قىزمەتكەرلەر بار. بۇدان بولەك زاۋىت جۇمىسكەرلەرىنە العىس حات، سالالىق ىنتالاندىرۋ سىيلىعى، ءبىرقاتار قىزمەتكەرلەرگە ەستەلىك سىيلىق تابىستالدى.
جەزقازعان مىس بالقىتۋ زاۋىتىنىڭ 55 جىلدىق مەرەيتويى – وندىرىستىك جۇيەنىڭ تۇراقتىلىعىنىڭ، ۇجىمنىڭ كاسىبي بىلىكتىلىگىنىڭ جانە كاسىپورىننىڭ تاۋ-كەن مەتاللۋرگيا سالاسىن دامىتۋ مەن ۇلىتاۋ وبلىسىنىڭ الەۋمەتتىك-ەكونوميكالىق ءال-اۋقاتىنا قوسقان ۇلەسىنىڭ ايعاعى.
كاسىپورىن جاڭعىرتۋ باعدارلاماسىن جۇزەگە اسىرۋدى، وندىرىستىك تيىمدىلىكتى ارتتىرۋدى جانە ەڭبەكتى قورعاۋ ستاندارتتارىن نىعايتۋدى جالعاستىرىپ، قازاقستانداعى مەتاللۋرگيالىق ءوندىرىستىڭ كوشباسشىلارىنىڭ ءبىرى مارتەبەسىن ساقتاپ كەلەدى.
