Jetisýdyń memlekettik qyzmetshilerine qurmet kórsetildi

Dalanews 26 maý. 2017 02:40 340

Almaty oblysynyń 6 memlekettik qyzmetshisi «Úzdik memlekettik qyzmetshi» tósbelgisimen marapataldy. Bul týraly búgin Taldyqorǵan qalasyndaǵy İ. Jansúgirov atyndaǵy Mádenıet saraıynda memlekettik qyzmetshi kúnine oraı ótkizilgen saltanatty jıynda belgili boldy. Memlekettik qyzmetshilerdi oblys ákiminiń birinshi orynbasary Lazzat Turlashov quttyqtady.

Óz quttyqtaýynda L. Turlashov Elbasynyń memlekettik apparatty jańǵyrtý máselesine erekshe nazar aýdaryp otyrǵanyna toqtaldy. Bul óz kezeginde memlekettik basqarýdy jetildirýge, halyqqa qyzmet kórsetý sapasyn arttyrýǵa, memlekettik qyzmetshilerdiń jumys isteýine qolaıly jaǵdaı jasaýǵa yqpal etetinin aıtty.



– Memlekettik qyzmet – bizge úlken jaýapkershilik júkteıdi. Elbasymyz Nursultan Ábishuly Nazarbaev óziniń «100 naqty qadam» Ult josparynda aldymyzǵa «Kásibı memlekettik apparat qurý» mindetin qoıdy.  Bul oraıda  memlekettik qyzmetkerdiń biliktiligi men kásibı deńgeıi týraly taqyryptyń basty másele retinde kórsetilýi tegin emes.  Árbir salanyń jetistigi, aldaǵy ekonomıkalyq ósim, ındýstrıalandyrý saıasatynyń tıimdiligi, halyqtyń ál-aýqaty, jalpy alǵanda, eldiń damý deńgeıi saýatty da kásibı basqarýshylyqqa tikeleı baılanysty, – dep atap ótken oblys ákiminiń birinshi orynbasary jıynǵa qatysýshylardyń el ıgiligi jolyndaǵy eńbekterine jemis tiledi.

Saltanatty sharada 6 memlekettik qyzmetshi «Úzdik memlekettik qyzmetshi» tósbelgisimen jáne birqatar azamattar oblys ákiminiń Qurmet gramotasymen, Alǵys hatymen marapattaldy.

Munan keıin sóz alǵan Memlekettik qyzmet isteri jáne sybaılas jemqorlyqqa qarsy is-qımyl agenttiginiń Almaty oblysy boıynsha departamentiniń basshysy Serikbaı Nurǵısaev ta memlekettik qyzmetshilerge izgi tilegin bildirip, marapattar tapsyrdy.

Memlekettik qyzmetke jańadan qabyldanǵan jas mamandar ant qabyldady.

Merekelik jıyn sońy oblystyq Súıinbaı atyndaǵy fılarmonıanyń konsertine ulasty.



 

Almaty oblysy ákimniń baspasóz qyzmeti

Usynylǵan
Sońǵy jańalyqtar