Búgin Almaty qalasyndaǵy «Astana» alańynda Almaty oblysy aýyl sharýashylyǵy taýar óndirýshileriniń jármeńkesi ótti. Onda óńirdiń 17 aýdany men 3 qalasynan jetkizilgen azyq-túlik saýdalandy. Jármeńkede jalpy quny 174,8 mıllıon teńge bolatyn 455 tonna kóleminde aýylsharýashylyq ónimi usynyldy, – dep habarlaıdy Dalanews.kz Almaty oblysy ákiminiń baspasóz qyzmetine silteme jasap.

Qalalyqtar úshin 36,0 tonna et, 21,0 tonna sút ónimderi, 114,7 tonna kókónis pen 38,0 tonna jemis-jıdek, 15,8 tonna balyq, 38 tonna kartop jáne basqa da taýarlar saýdaǵa shyǵaryldy. Jármeńkedegi azyq-túlik baǵasy qala bazarynan 10-15 paıyzǵa arzan baǵada qoıyldy.

– Eńbekshiqazaq aýdany Shelek aýylynda turamyn. 8 gektar alma baǵym bar. Jyl saıyn ótetin dástúrli jármeńkeni saǵynyp qalyppyz. Saýdamyz oıdaǵydaı júrýde, – deıdi jármeńkege arnaıy kelgen kásipker Taıyr Qaldaıaqov. Sondaı-aq, saýda sórelerinde Tekeli sút zaýytynyń ónimderine, Eskeldi aýdanynyń balyna, Eńbekshiqazaq aýdanynyń almasyna, Narynqoldyń kartobyna, Baqanastyń kúrishine, Kóksý men Aqsýdyń et ónimderine, basqa da tabıǵı taza ónimderge degen suranys óte joǵary boldy.

Jármeńkeniń ótý barysyn oblys ákiminiń orynbasary Serik Turdalıev bastaǵan jumys toby qadaǵalap, saýdanyń qalaı júrip jatqanyn kórip, aýyldan kelgen sharýa qojalyqtarynyń jetekshilerimen pikirlesti.