Atalmysh jobanyń iske asýyna 18 mlrd teńgeden astam qarjy bólingen. Búgingi tańda birinshi baǵyt boiynsha 135 adam qysqa merzimdi oqytýdan ótip jatyr.
Kásip bastap, jeke biznes iesi atanýǵa yqylas tanytqan 1100 kásipkerge shaǵyn nesie berilip, 27 myńnan astam adam qoǵamdyq jumystarǵa tartylmaq.
Mamandardyń aitýynsha, baǵdarlamaǵa qatysý erejeleri ótken jylmen salystyrǵanda birshama jeńildegen. Endigide nesie alý úshin jeke kásipkerlik retinde tirkeýdiń esh qajeti joq. Bar bolǵany biryńǵai jiyntyq tólem jasasańyz jetkilikti.
Al kópbalaly jáne áleýmettik turǵydan az qamtylǵan otbasylar grant alý úshin burynǵydai «Bastaý» kýrsynan ótpeidi.
– Qysqa merzimdi oqytý bitirýdiń de qajeti joq. Baryp, aryzyn tapsyrsa qarjylai grant ala alady. Muny «Eńbek» baǵdarlamasynyń sheńberindegi mańyzdy ózgeris dep ataýǵa bolady. Sonymen qatar, jastardy jastar tájiribesine joldap jatyrmyz. Qazirgi ýaqytta 477 túlek jastar praktikasynan ótýde, – deidi oblystyq jumyspen qamtý jáne áleýmettik baǵdarlamalar basqarmasynyń basshysy Baqyt Toqtarqyzy.
Anar Sabyrova, Almaty oblysy.
