Táýelsizdik kúni qarsańynda Jetisý oblysynda jergilikti mádeniet mekemelerine avtokólikter berildi. Oblys ákiminiń atynan tehnika kiltterin orynbasary Dias Esdáýletov tabystady, dep habarlaidy Dalanews.kz.
Taldyqorǵandaǵy ortalyq alańda ótken saltanatty sharada óńir basshysynyń orynbasary mádeniet qyzmetkerleriniń Jetisýdyń ónerin óristetýge, halyqtyń rýhani damýyna qosyp otyrǵan úlesin erekshe atap ótti.
"Mádeniet salasy mamandarynyń alańsyz jumys isteýine jaǵdai jasaý, mádeniet nysandaryn materialdyq-tehnikalyq jaǵynan júieli túrde nyǵaitý – bizdiń basty mindetimizdiń biri. Búgin salanyń tehnikalyq bazasyn shaǵyn avtobýstarmen jáne júk kólikterimen tolyqtyryp otyrmyz. Bul kólikter mádeniet ujymdarynyń gastroldik saparlarǵa shyǵýyna, qajetti qural-jabdyqtar men dekoratsiialardy tasymaldaýyna, túrli festival, baiqaýlarǵa qatysýyna múmkindik týǵyzyp, jumys sapasyna oń áser etedi dep senemiz", - dedi D. Esdáýletov mekeme basshylaryna avtokólik kiltterin tapsyrdy.
Atap ótsek, osy kúni oblystaǵy 8 aýdandyq, 2 qalalyq mádeniet úilerine, S. Seifýllin atyndaǵy oblystyq ámbebap kitaphanasy, oblystyq arhiv, Kórkemsýret galereiasy men Halyq shyǵarmashylyǵy ortalyǵyna jalpy sany 13 Gazel, 1 júk kóligi berildi.
Jańa tehnikaǵa ie bolǵan mekeme ujymdarynyń atynan Alakól aýdandyq Zeinep Qoishybaeva atyndaǵy mádeniet úiiniń direktory Otan Smaǵulov sóz sóilep, rizashylyǵyn bildirdi.
- Búgin Jetisý óńiriniń mádeniet salasy qyzmetkerleri úshin tarihi kún deýge bolady. Sala nysandaryna bir kúnde osynsha kólik berý oqiǵasy alǵash ret bolyp tur. Bul – ulttyq qundylyqtardy nasihattap júrgen azamattarǵa kórsetilip otyrǵan qamqorlyq, bizge shyǵarmashylyq serpilis beretin igilikti is. Bir ǵana bizdiń Alakól aýdanynda 4 jańa mádeniet nysany salynyp jatyr, sonyń bireýi jýyrda paidalanýǵa beriledi, 3-eýi kelesi jyldyń úlesinde. Aldaǵy ýaqytta da rýhaniiat úshin eseli eńbek ete beremiz. Jetisý óńiriniń óneri men mádenieti jasai bersin, - dedi ol.
Atap ótsek, bul igi shara biyl ekinshi jyl qatarynan ótkizilgen «Jer jannaty - Jetisý» oblystyq televiziialyq baiqaýynyń marapattaý saltanatymen jáne gala kontsertimen jalǵasty.
Jalpy, Jetisý oblysy qurylǵannan beri mádeniet salasynyń infraqurylymy 36,2 % jańartyldy. Sońǵy úsh jylda sala mekemeleriniń materialdyq bazasyn nyǵaitýǵa biýdjetten
1 mlrd. teńgeden astam qarajat bólinip, mýzykalyq aspaptar, sahnalyq kiimder, kompiýterlik jabdyqtar, basqa da qajettilikter satyp alynǵan. Qazir oblysta 300-den astam mádeniet, arhiv mekemeleri jumys isteidi.
