Jıynda sóz alǵan oblys basshysy A. Batalov:
– «Úlken Almaty aınalma avtokólik jolynyń» iske asyryla bastaǵanyna qýanyshtymyz. Elbasymyz Nursultan Ábishuly Nazarbaevtyń turaqty baqylaýynyń nátıjesinde osyndaı úlken joba qolǵa alyna bastady. Bul jol Almaty qalasyndaǵy kólik legin azaıtýǵa baǵyttalǵan, degenmen ÚAAAJ-nyń aınalma joly oblystyń Qarasaı, İle, Talǵar aýdandarynyń aýmaǵyn da basyp ótedi. Sondyqtan qazirden bastap óz tarapymyzdan barlyq uıymdastyrý máseleleriniń sapaly atqarylýyna yqpal etýimiz kerek, – dedi.
Jobany júzege asyrýdaǵy daıyndyq jumystaryna toqtala kele:
– Jobaǵa baılanysty biz 742 jer ýchaskesin bosattyq, bul baǵyttaǵy máseleler tolyq sheshimin tapty. Endigi jerde tehnıkalyq sıpattaǵy máselelerge nazar aýdaryp, olardyń barlyǵyn der kezinde retteýimiz kerek. Óz kezeginde merdiger kompanıalar júktelgen mindetterdi oryndaýy tıis, – dedi A. Batalov.
Munan soń «ALSIM ARKO» AQ konsessıoner kompanıasynyń vıse-prezıdenti Abbas Shahın jobanyń tanystyrylymyn jasap, onda ony júzege asyrýdyń, qurylys jumystarynyń uıymdastyrylýynyń egjeı-tegjeıin baıandady. Ol toqtalǵan máseleler qatarynda vahtalyq lager, karerge arnalǵan burma, ınertti materıaldardy paıdalaný kólemi jáne t.b. bar.
Oblys ákimi A. Batalov atap ótkendeı, ÚAAAJ jobasyna qatysty týyndaǵan kez kelgen máseleni eń aldymen joǵaryda atalǵan úsh aýdannyń ákimderi jáne tıisti basqarmalardyń basshylary sheshýi tıis.
– Joba júzege asyrylatyn úsh jyl ishinde oblysqa 512,3 mlrd. teńge ınvestısıa tartylady. Oǵan qosa jańa jumys oryndary ashylady, osy jobany iske asyrý kezinde jumysqa qabyldanatyndardyń 90 %-i jergilikti turǵyndardan bolady, – dedi A. Batalov.
Kezdesý sońynda oblys ákimi bul jobanyń oryndalý barysy osy salaǵa jetekshilik etetin orynbasarlary A. Baıjanov pen J. Tuıaqovtyń jiti baqylaýynda bolatynyn aıtty.
Atap ótsek, «Úlken Almaty aınalma avtokólik joly» jobasy uzyndyǵy 66 shaqyrymdyq avtojolyn salý men iske qosýǵa baǵyttalǵan. Jabyndysy sement-betondy avtokólik joly 4 jáne 6 jolaqty bolmaq. Jobanyń quramyna kólik jol aıyryǵy, kópirler, estakadalar, jol kórsetkishteri jáne basqa da qajetti quraldar engizilgen. Qurylys 2018-2021 jyldar aralyǵynda júrmek. Jobanyń konsessıoneri - «Alarko-Makyol-SK-Korea Express Way»túrik-koreı konsorsıýmy.
Almaty oblysy ákiminiń baspasóz qyzmeti
https://dalanews.kz/34749
