Jetisýda «Jaýjúrek polk» sherýinde júrip ótti
9 Mamyr merekesi Taldyqorǵanda Dańq obeliskisine gúl shoqtaryn qoiýdan bastalyp, negizgi sharalar «Jastar» saiabaǵynda jalǵasty. Eń aldymen kórermenderge «Urpaqtar umytpaityn Uly Jeńis» atty teatrlandyrylǵan kórinis usynyldy. Onda soǵys bastalǵannan Jeńiske qol jetkizgenge deiingi aralyqtaǵy surapyl jyldardyń aýyr kezeńderi kórsetildi. Qalanyń ortalyq kóshelerimen «Jaýjúrek polk» sherýiniń júrip ótýi de Jeńiske degen qurmetti eselei tústi.
Ardaqty ardagerler men jinalǵan qaýymdy merekemen quttyqtaǵan oblys ákiminiń birinshi orynbasary L.Turlashov:
– Búgin batyrlyq pen janqiiarlyq erliktiń, birlik pen tatý tirliktiń merekesi – Uly Jeńiske 73 jyl tolyp otyr. Barshańyzdy osy aitýly merekemen shyn júrekten quttyqtaimyn! Elbasymyz Nursultan Ábishuly Nazarbaev «Aǵa urpaqtyń jeńisi men búgingi bizdiń jetistigimiz – bir-birimen tyǵyz bailanysty. Eger aǵa býynnyń erligi bolmaǵanda, biz mundai memleket qura almas edik, – dep erekshe atap kórsetti. Bul surapyl soǵysqa 1 million 800 myń qazaqstandyq attanyp, sonyń teń jartysy qan maidannan qaitpady. Búgin qasymyzda júrgen soǵys ardagerleri – bizdiń maqtanyshymyz. Olar Otan qorǵaý jolynda naǵyz patriotizmniń úlgisin kórsetti. Aǵa býyn jastardy tárbielep, elimizdiń ósip-órkendeýi úshin atsalysty. Ardagerlerge barynsha qamqorlyq jasaý – bizdiń qasietti boryshymyz, – dep atap ótti.
Jeńisti jaqyndatýdaǵy jetisýlyqtardyń qosqan úlesin aita kele, ardagerlerge myqty densaýlyq, beibit ómir tiledi.
Merekelik kontsertte oblystyń shyǵarmashylyq ujymdary, Qazaqstan estradasynyń jaryq juldyzy Álibek Dinishev patriottyq rýhtaǵy repertýarlarymen halyqtyń ystyq yqylasyna bólendi. Atap aitqanda Uly Jeńis, bereke-birlik, dostyq pen súiispenshilik, Otan jaiyndaǵy ánder merekeniń salmaǵyn arttyra tústi. Saiabaqta dástúrli «Dala ashanasy» qoiylyp, ardagerler ashanadan dám tatty.
Osy kúni «Taldyqorǵan» ippodromynda merekege orai ulttyq at sporty túrlerinen respýblikalyq jarys ótip, keshkilik «Jastar» saiabaǵynda jastarǵa arnalǵan bi keshi men merekelik otshashý uiymdastyrylady.
Baljan Qairatqyzy,
Taldyqorǵan qalasy.
