Jetisý oblysynda jastarǵa arnalǵan «JASTAR INFO» aqparattyq keńes berý pýnkti ashyldy. Bul joba jastarǵa qajetti keńesterdi bir jerde shoǵyrlandyryp, olardyń bilim alýyna, jumysqa ornalasýyna, quqyqtyq saýattylyǵyn arttyrýǵa jáne áleýmettik múmkindikterdi tiimdi paidalanýyna jaǵdai jasaýǵa baǵyttalǵan, dep habarlaidy Dalanews.kz.
Is-shara barysynda óńirdegi jaýapty tulǵalar sóz sóilep, jastar saiasatynyń mańyzdylyǵyna toqtaldy. Sonymen qatar qatysýshylarǵa jańa aqparattyq pýnkttiń múmkindikteri tanystyrylyp, onyń jumysy jan-jaqty kórsetildi. Atap aitqanda, pýnkt birneshe negizgi baǵyttar boiynsha qyzmet kórsetedi. Máselen, bilim berý salasynda – mamandyq tańdaý, oqý oryndaryna túsý jáne bilim baǵdarlamalary boiynsha keńes berý, quqyqtyq baǵytta – jastardyń quqyqtary men mindetterin túsindirý, zańgerlik keńes berý jáne quqyq buzýshylyqtyń aldyn alý, NEET sanatyndaǵy jastar boiynsha – jumysqa ornalasý, memlekettik baǵdarlamalarǵa qatysý, túiindeme ázirleý jáne suhbattan ótý daǵdylaryn damytý, eńbekpen qamtý baǵytynda – bos jumys oryndary týraly aqparat berý, kásibi baǵdarlaý jáne eńbek naryǵyna beiimdeýdi atap ótýge bolady.
- Bizdiń bastamamyzben jastardy jan-jaqty damytýǵa baǵyttalǵan keńes berý pýnkti ashylyp otyr. Munda jastardyń ózine qajetti baǵyt boiynsha kásibi mamandardan tegin ári sapaly keńes alý múmkindigi bar. Bul nysan tek aqparat berý ortalyǵy ǵana emes, sonymen qatar jastar men memlekettik qoldaý tetikteri arasyndaǵy bailanysty nyǵaitatyn mańyzdy alańǵa ainalady dep senemin, - «Jetisu jastary» KMM direktory Shamil Vankeev.
Sharaǵa qatysqan jastar da óz pikirin bildirdi.
- «JASTAR INFO» pýnktiniń ashylýy men úshin qýanyshty jańalyq boldy. Sebebi biz siiaqty jastarǵa bolashaq mamandyqty durys tańdaý, oqý oryndary men bilim baǵdarlamalary týraly naqty ári senimdi aqparat alý asa mańyzdy. Osy pýnkt arqyly ózime qajetti baǵyttar boiynsha tolyqqandy keńes alyp, bolashaǵyma degen senimdilik paida boldy. Mundai ortalyqtardyń kóbeigenin qalaimyn, - dedi Aida Karabalanova.
- Men úshin eń mańyzdysy jumyspen qamtý baǵyty boldy. Osy jerde bos jumys oryndary týraly naqty aqparat alyp, eńbek naryǵynyń talaptaryn túsindim. Buryn boiymda senimsizdik bolsa, endi qai baǵytta damý kerektigin túsindim. Osyndai pýnktter jastardyń jumys tabýyna lń yqpalyn tigizedi dep oilaimyn, - dedi Daniiar.
