Aýyl sharýashylyǵy qyzmetkerlerin kásibi merekelerimen quttyqtaǵan oblys ákimi Qanat Bozymbaev agroónerkásip kesheniniń el ómirindegi mańyzyna toqtaldy.
– Eldigimizdi eselep, birligimizdi nyǵaitqan Táýelsizdik jyldary ishinde aýyl sharýashylyǵy salasy memlekettik qoldaýdyń arqasynda jańa deńgeige kóterildi. Búginde osy salada 400 myńǵa jýyq adam eńbek etip, oblys damýyna zor úles qosyp keledi. Biz jyl sońyn jaqsy nátijelermen aiaqtap otyrmyz. Aýyl sharýashylyǵynda óndiris kólemi bir trillionǵa jetti. Óńirde biyl 16 myńnan astam sharýashylyq qurylymdaryna biýdjetten 50 mlrd. teńgeden astam qarajat berildi, onyń 43 mlrd. teńgesi – sýbsidiia. Prezidentimizdiń agroónerkásip keshenindegi eńbek ónimdiligin jəne ónim eksportyn 2,5 esege arttyrý týraly tapsyrmasyn oryndaý men josparlanǵan sharalardy iske asyrýǵa oblysta barlyq múmkindik bar. Nátijeli kórsetkishterge ózderińizben birlesip qol jetkizetin bolamyz, – dedi Qanat Bozymbaev.
Shara budan ári marapattaý rásimen jalǵasyp, jyl boiy agrarlyq salada jemisti eńbek etken ujymdarǵa nagradalar jáne syi-siiapattar berildi. Atap aitqanda, «Aýyl sharýashylyǵy jármeńkesi» baiqaýynda aýdandar arasynda Eńbekshiqazaq aýdany, okrýgter arasynda Panfilov aýdany, Aidarly aýyldyq okrýgi úzdik dep tanyldy. Osy atalym boiynsha Balqash, Talǵar, Qarasai, Kegen, Raiymbek, Eskeldi, Kerbulaq aýdandarynyń da eńbegi elendi. Sol siiaqty aýyl sharýashylyǵy ónimderin qaita óńdeý salasynyń jeńimpazdary retinde «Úshtóbe Aidyn» JShS, «Makariia» JShS jáne «Almaty tannery» JShS-lary tanyldy. Atalǵan jeńimpazdardyń barlyǵyna aqshalai syilyqtar tabys etildi.
Al «Úzdik aýyl sharýashylyǵy taýar óndirýshileri» nominatsiiasynda Ile aýdanyndaǵy «Dáýlet Beket» JSSh men Eskeldi aýdanyndaǵy «Nam» sharýa qojalyǵy oq boiy ozyq shyǵyp, olarǵa «MTZ-82.1» traktory berildi. Osy qatarda alakóldik «Alakól Agro» seriktestigi, Kegen aýdanynan «Rinat» sharýa qojalyǵy, Sarqan aýdanynan «SairanbekAgro» JShS, Kóksý aýdanynan «QainarKóksý» ShQ biik mejeden kórinip, eńbekteri elendi.
Sol siiaqty birqatar azamattarǵa Aýyl sharýashylyǵy ministrliginiń «Eńbek ardageri», «Aýyl sharýashylyǵy salasynyń úzdigi» tósbelgisi tabystaldy.
Marapat ieleri atynan sóz alǵan «Dáýlet Beket» JShS basshysy Dáýlet Sydyqov el táýelsizdiginiń arqasynda jiyrma jyldan beri túie sharýashylyǵymen ainalysyp, kásibin órkendetip otyrǵanyn atap ótti.
– Bir malym ekeý bolsa aýylymdy kórkeitemin dedim. Sondai nietpen 100 oryndyq balabaqsha, 100 oryndyq shipajai saldym. Jýyrda túieniń qurǵaq sútin shyǵaratyn zaýyt ashtym. Qazir 5 myń bas túiem bar. Munymen toqtap qalmai, eldiń igiligi úshin áli de qyzmet ete beremin, – dedi Dáýlet Sydyqov. Sonymen birge Qazaq eginshilik jáne ósimdik sharýashylyǵy ǵylymi-zertteý institýtynyń basqarma tóraiymynyń mindetin atqarýshy Sholpan Bastaýbaeva da merekege orai quttyqtaý tilegin bildirdi.
Taldyqorǵandaǵy I.Jansúgirov atyndaǵy Mádeniet saraiynda ótken saltanatty jiynda foiege óńirde óndiriletin aýyl sharýashylyǵy taýarlarynan kórme uiymdastyryldy.
