Jetisý oblysynda «Naýryz kanikýl – 2025» jobasy aiasynda oqýshylar arasynda teatr festival-baiqaýy, voleibol, basketbol, fýtbol siiaqty tanymal sport túrlerinen jarystar uiymdastyrylyp, ekskýrsiialar, ashyq esik kúni, túrli taqyrypta chellendjder, vebinarlar, jas sýretshiler basqosýy siiaqty kóptegen is-sharalar ótkizilýde. Oqýshylardyń demalysyn paidaly uiymdastyrý maqsatyndaǵy bul sharalarǵa 12600-ge jýyq bala qatysty, dep habarlaidy Dalanews.kz Jetisý oblysy ákiminiń baspasóz qyzmetine silteme jasap.
Máselen, joba aiasynda jasóspirimder nashaqorlyǵynyń aldyn alý baǵytynda «Teatr – tárbie bastaýy» atty oblystyq festival-baiqaýy ótti. Uiymdastyrýshylar mundai baiqaýlar óskeleń urpaqtyń rýhani-adamgershilik qasietterin damytyp, balalardy teatr shyǵarmashylyǵyna baýlidy, jat áreketterden saqtandyrýǵa yqpal etedi dep esepteidi. Baiqaýǵa ár aýdan-qaladan úzdik shyqqan jalpy sany 10 komanda qatysyp, olar nashaqorlyq pen jastar býllinginiń ziiandylyǵyn, ustazǵa degen qurmetti tanytatyn kórinister usyndy. Úzdikterge júldeli oryndar berilip, sondai aq, «Úzdik dekoratsiia», «Úzdik jas aktrisa», «Úzdik jas akter», «Úzdik sahnalyq kostiým», «Úzdik jas rejisser» nominatsiialary boiynsha Alǵys hattar tapsyryldy.
Júldeli birinshi orynǵa ie bolǵan Kerbulaq aýdanyndaǵy Kúreńbel qazaq orta mektebiniń oqýshylary baiqaýdyń paidasy zor bolǵanyn aitady.
- Jalpy akterlik ónerge burynnan qyzyǵýshylyǵym bar. Múmkindik bolsa, teatrǵa kelip, spektaklder tamashalaǵandy unatamyn. Bul baiqaýda biz áke men bala arasyndaǵy qarym-qatynasqa qurylǵan oqiǵa arqyly nashaqorlyqtyń túbi jarǵa jyǵatyny jaily qoiylym usyndyq. Zalda kórip otyrǵan kórermender ónerimizge rizashylyqpen qol soqty. Bul qoiylym ózimiz siiaqty jasóspirimderge oi saldy dep oilaimyn, - deidi ónerli top múshesi, 10 synyp oqýshysy Ádil Ádilhan.
Budan bólek, kanikýl kezinde «Ájemniń ádemi áńgimesi», «Eńbek bárin jeńbek» chellendjderi ótti. Chellendj barysynda oqýshylar qazaq halqynyń bai mádenietimen, kóne ádet-ǵurpymen tanysty, otbasy músheleriniń birlesken eńbeginiń jemisin kórsetip, yntymaǵyn tanytty.
- Men eńbek chellendjine ata-anammen birge qatystym. Áke-sheshemmen birge baqshada jumys istedik, úidi tazaladyq, dámdi tamaqty da birlesip pisirdik. Bir-birimizge kómekteskenimiz, bir-birimizdi qoldaǵanymyz bizdi burynǵydan da jaqyndastyra tústi. Endi men otbasyma kúndelikti kómektesýge tyrysamyn, - deidi Taldyqorǵan qalasyndaǵy N.Ostrovskii atyndaǵy № 8 orta mekteptiń 10 «a» synyp oqýshysy Arýna Muqamiia.
Al «Talanttar sherýi» vebinarynda qosymsha bilim berý mekemeleriniń 150 tárbielenýshisi ózderi jasaǵan qolóner buiymdaryn, shyǵarmashylyq jobalaryn usynyp, ózara tájiribe almasty. Erteń ótetin jas sýretshilerge arnalǵan «Ashyq aýadaǵy sýret» plenerinde de osyndai múmkindikter jasalatyn bolady. Sonymen qatar oblys aýmaǵynda ornalasqan mýzeilerge, Kórkem sýret galereiasyna myńǵa jýyq bala ekskýrsiia jasaýda.
Kanikýl kezeńinde sporttyq sharalar da keńinen uiymdastyryldy. Voleibol, basketbol, fýtboldan ótken sporttyq irikteý jarystaryna qatysqan 1883 oqýshynyń ishinen oza shyqqandary búgin jarystyń oblystyq kezeńinde baq synasýda. Jalpy jarys barysynda oqýshylarǵa 390 dop úlestirildi.
- Balalardyń demalysyn paidaly uiymdastyrý arqyly olardyń jeke tulǵa retinde rýhani jáne fizikalyq jaǵynan damýyna, jat qylyqtardan aýlaq bolyp, jaqsy isterge umtylýyna yqpal etsek degen maqsatymyz boldy. Osyǵan orai «Naýryz kanikýl – 2025» jobasy aiasynda ótken is-sharalarda otbasy qundylyǵy men adal eńbektiń paidasyn uǵyndyrý, dástúrdi tanytý, dene shynyqtyrý men shyǵarmashylyq ónerin shyńdaý siiaqty kóptegen baǵyttar qamtyldy. Olarǵa oqýshylardy barynsha kóp tartýǵa tyrystyq, jalpy sany 12600-ge jýyq bala qatysty. Joba urpaq tárbiesindegi óziniń tiimdiligin kórsetti, - deidi oblystyq bilim basqarmasyna qarasty Dene tárbiesi, sport, alǵashqy áskeri daiyndyǵy jáne qosymsha bilim berýdiń ǵylymi-tájiribelik ortalyǵy direktorynyń orynbasary Aqbaian Sýniiatova.
Atap ótsek, aldaǵy kúnderi tótenshe jaǵdailar kezindegi is-áreket taqyrybynda oqytý-vebinary, ashyq esik kúni, jas sarbaz kadet synybynyń UOS ardagerleri úiiniń aýlasyn tazalaý t.b. kóptegen paidaly sharalar josparlanyp otyr.
