Sharada komandanyń jańa quramy tanystyryldy. Klýb jetekshisi jýyrda birneshe jańa oıynshymen kelisimge otyrǵan bolatyn. Sóıtip «Jetisý» áıelder komandasynyń quramy 2017-2018 oıyn maýsymynda Lúdmıla Malofeeva, Krıstıana Karapetán, Danıela Nıkıch, Ekaterına Popova, Aleksandra Rogýlınamen tolyqty. Komanda jattyqtyrýlyqty buǵan deıin de osy qyzmette bolǵan, QR eńbek sińirgen sport sheberi, elimizdiń Ulttyq quramasynyń bas jattyqtyrýshysy Vácheslav Shapran jalǵastyra bermek.
Erler komandasyna kelsek, komanda 13 oıynshydan turady, jattyqtyrýshysy – voleıboldan sport sheberi, «Jetisý – Jastar» komandasynyń bas jattyqtyrýshysy Dmıtrıı Zverev.
Saltanatty sharaǵa oblys ákimi, voleıboldan sport sheberi, Qazaqstan Voleıbol federasıasynyń vıse-prezıdenti, Almaty qalasy men Almaty oblysy Voleıbol federasıasynyń prezıdenti Amandyq Batalov qatysty.
– Qurmetti sportshylar men jattyqtyrýshylar! «Jetisý» voleıbol klýby óńirimizdiń sporttyq sımvoldarynyń birine aınalyp úlgerdi. Osy komandanyń jańa quramyn bilý, taný sport súıer qaýymnyń qyzyǵýshylyǵyn týǵyzatyny anyq. Sondyqtan jańa maýsymnyń aldynda halyqqa sporttyq komandalardyń quramyn tanystyryp, oıynshylarǵa sáttilik tileıik dep bas qosyp otyrmyz. Biz «Jetisý» komandasynyń oıynshylary men jattyqtyrýshylaryna úlken senim artamyz. Aldaǵy maýsymda sizderdi Qazaqstan chempıonaty Ulttyq lıgasy komandalary arasyndaǵy tartysty oıyndar kútip tur. Osy dodalarda kásibı deńgeıden kórinip, jarqyn jeńisterge jetesizder dep senemin. Sizderge shyn júrekten tek sáttilik tileımiz! – dedi oblys basshysy A. Batalov.
– Biz budan ári de qarqyndy jattyǵyp, ózimizdiń kásibı deńgeıimizdi, sheberligimizdi shyńdaı beremiz. Jańa maýsymda jarqyn oıyn úlgisin kórsetip, jeńis tuǵyrynda bolýǵa tıispiz, – dedi «Jetisý» áıelder komandasynyń bas jattyqtyrýshysy Vácheslav Shapran.
Komanda oıynshylary atynan sóılegen Márlen Aıtjanov pen Lúdmıla Malofeeva ózderine artylǵan zor senimdi aqtaıtyndyqtaryna sendirdi.
Tanystyrylym saltanatynan keıin jasóspirim sportshylar klýb múshelerine 30 voleıbol dobyn usyndy. Sportshylar oǵan óz qoltańbalaryn qoıyp, tilegin jazyp jankúıerlerine taratty.
Almaty oblysy ákiminiń baspasóz qyzmeti
