شارادا كوماندانىڭ جاڭا قۇرامى تانىستىرىلدى. كلۋب جەتەكشىسى جۋىردا بىرنەشە جاڭا ويىنشىمەن كەلىسىمگە وتىرعان بولاتىن. ءسويتىپ «جەتىسۋ» ايەلدەر كومانداسىنىڭ قۇرامى 2017-2018 ويىن ماۋسىمىندا ليۋدميلا مالوفەيەۆا، كريستيانا كاراپەتيان، دانيەلا نيكيچ، ەكاتەرينا پوپوۆا، الەكساندرا روگۋلينامەن تولىقتى. كوماندا جاتتىقتىرۋلىقتى بۇعان دەيىن دە وسى قىزمەتتە بولعان، ق ر ەڭبەك سىڭىرگەن سپورت شەبەرى، ەلىمىزدىڭ ۇلتتىق قۇراماسىنىڭ باس جاتتىقتىرۋشىسى ۆياچەسلاۆ شاپران جالعاستىرا بەرمەك.
ەرلەر كومانداسىنا كەلسەك، كوماندا 13 ويىنشىدان تۇرادى، جاتتىقتىرۋشىسى – ۆولەيبولدان سپورت شەبەرى، «جەتىسۋ – جاستار» كومانداسىنىڭ باس جاتتىقتىرۋشىسى دميتريي زۆەريەۆ.
سالتاناتتى شاراعا وبلىس اكىمى، ۆولەيبولدان سپورت شەبەرى، قازاقستان ۆولەيبول فەدەراسياسىنىڭ ۆيسە-پرەزيدەنتى، الماتى قالاسى مەن الماتى وبلىسى ۆولەيبول فەدەراسياسىنىڭ پرەزيدەنتى اماندىق باتالوۆ قاتىستى.
– قۇرمەتتى سپورتشىلار مەن جاتتىقتىرۋشىلار! «جەتىسۋ» ۆولەيبول كلۋبى ءوڭىرىمىزدىڭ سپورتتىق سيمۆولدارىنىڭ بىرىنە اينالىپ ۇلگەردى. وسى كوماندانىڭ جاڭا قۇرامىن ءبىلۋ، تانۋ سپورت سۇيەر قاۋىمنىڭ قىزىعۋشىلىعىن تۋعىزاتىنى انىق. سوندىقتان جاڭا ماۋسىمنىڭ الدىندا حالىققا سپورتتىق كوماندالاردىڭ قۇرامىن تانىستىرىپ، ويىنشىلارعا ساتتىلىك تىلەيىك دەپ باس قوسىپ وتىرمىز. ءبىز «جەتىسۋ» كومانداسىنىڭ ويىنشىلارى مەن جاتتىقتىرۋشىلارىنا ۇلكەن سەنىم ارتامىز. الداعى ماۋسىمدا سىزدەردى قازاقستان چەمپيوناتى ۇلتتىق ليگاسى كوماندالارى اراسىنداعى تارتىستى ويىندار كۇتىپ تۇر. وسى دودالاردا كاسىبي دەڭگەيدەن كورىنىپ، جارقىن جەڭىستەرگە جەتەسىزدەر دەپ سەنەمىن. سىزدەرگە شىن جۇرەكتەن تەك ساتتىلىك تىلەيمىز! – دەدى وبلىس باسشىسى ا. باتالوۆ.
– ءبىز بۇدان ءارى دە قارقىندى جاتتىعىپ، ءوزىمىزدىڭ كاسىبي دەڭگەيىمىزدى، شەبەرلىگىمىزدى شىڭداي بەرەمىز. جاڭا ماۋسىمدا جارقىن ويىن ۇلگىسىن كورسەتىپ، جەڭىس تۇعىرىندا بولۋعا ءتيىسپىز، – دەدى «جەتىسۋ» ايەلدەر كومانداسىنىڭ باس جاتتىقتىرۋشىسى ۆياچەسلاۆ شاپران.
كوماندا ويىنشىلارى اتىنان سويلەگەن مارلەن ايتجانوۆ پەن ليۋدميلا مالوفەيەۆا وزدەرىنە ارتىلعان زور سەنىمدى اقتايتىندىقتارىنا سەندىردى.
تانىستىرىلىم سالتاناتىنان كەيىن ءجاسوسپىرىم سپورتشىلار كلۋب مۇشەلەرىنە 30 ۆولەيبول دوبىن ۇسىندى. سپورتشىلار وعان ءوز قولتاڭبالارىن قويىپ، تىلەگىن جازىپ جانكۇيەرلەرىنە تاراتتى.
الماتى وبلىسى اكىمىنىڭ باسپا ءسوز قىزمەتى
