Jetisý oblysynda úshinshi qant zaýytynyń qurylysyn júrgizý týraly investorlarmen kelisimder jasalyp jatyr. Sonyń nátijesinde 1 mln. tonnaǵa deiin qant qyzylshasyn óńdeýge múmkindik týady. Bul týraly oblys ákimi Beibit Isabaev «Jetisy» telearnasy stýdiiasynda oblystyq BAQ ókilderine bergen keńeitilgen suhbaty barysynda aitty, - dep habarlaidy Dalanews.kz.
Jeńis Ysqabai
"Biyl Kóksý qant zaýytyna 60 mln evroǵa modernizatsiialyq jańartý jumystary júrgiziledi. Sol arqyly zaýyttyń jyldyq qýattylyǵy 500 myń tonnaǵa jetedi. Al Aqsý qant zaýytynyń qýattylyǵy - 350-400 myń tonna. Sonda qazirdiń ózinde 800-900 myń tonna qyzylsha óńdeýge qabiletimiz bar. Jetisý jeriniń qunary jetkilikti. Oǵan qosa sýarý júielerin jańǵyrtyp, sýarmaly jerlerdiń kólemin arttyramyz. Sol kezde qant qyzylshasynyń kólemin 1 000 000 tonnaǵa jetkizýge múmkindigimiz bar. Mundai mol ónimdi úshinshi qant zaýytyn iske qossaq, ózimizde tolyqtai óńdei alamyz", - dedi B.Isabaev.
Eske salsaq, byltyr Jetisý oblysynda 13 myń gektar jerden 630 myń tonna qant qyzylshasy jinaldy. Bul - táýelsizdik alǵan jyldardan bergi alǵashqy mol ónim. Ortasha kórsetkish gektaryna 450-500 tsentnerden ainaldy. Oblys ákiminiń aitýynsha, mundai úlken kórsetkishtiń artynda óte aýqymdy jumys jatqanyn anyq. Al ótkizýdegi ýaqytsha qiyndyq Jambyl oblysyndaǵy diqandardyń jaǵdaiyna bailanysty týyndaǵan. Jambyl oblysynan 100 myń tonna qant qyzylshasyn qabyldap, Aqsý qant zaýytyna óńdeýge alynǵan.
Jetisý oblysy ákimdiginiń baspasóz qyzmeti
Biylǵy jyldyń josparlaryna toqtalǵan óńir basshysy aýyl sharýashylyǵy ónimderin óńdeýge kóp kóńil bólinetinin atap ótti. Osy maqsatta oblysta qus fabrikasyn jáne júgeri óńdeitin zaýyt salý týraly investorlarmen jumys júrgizilip jatyr.
Jalpy óńirde óndiriletin qant qyzylshasy, júgeri, bidai, et, sút siiaqty aýyl sharýashylyǵy taýarlarynyń 65%-y ózimizde óńdeledi. Ótken jyly aýyl sharýashylyǵyndaǵy ósim 3% boldy.
