2025-2026 oqý jylynyń Almaty mektepteriniń túlekteri qalanyń bilim berý haby retindegi mártebesin taǵy bir márte dáleldep, halyqaralyq deńgeide joǵary básekege qabilettiligin kórsetip keledi. Jyl basynan búgingi kúnge deiin shahardyń júzdegen 11-synyp oqýshysy AQSh, Ulybritaniia, Shveitsariia, Frantsiia, Aýstriia, Gonkong, Singapýr, Ońtústik Koreia jáne Túrkiianyń jetekshi ýniversitetterinen shaqyrtý men bilim granttaryn aldy, dep habarlaidy dalanews.kz.
Almatylyq oqýshylar ásirese, jasandy intellekt (AI), biohimiialyq injeneriia, IT, halyqaralyq logistika jáne tsifrlyq kommýnikatsi siiaqty suranysqa ie ári tehnologiialyq baǵyttar boiynsha granttarǵa erekshe kóńil bólip otyr.
Úzdik ýniversitetterden shaqyrtý alý sany boiynsha dástúrli túrde Bostandyq aýdanynyń túlekteri kósh bastap keledi. Biylǵy jarqyn jetistikterdiń qatarynda:
Sálima Dáýletkerei (№105 gimnaziia), himiia páninen halyqaralyq olimpiadanyń kúmis júldegeri, álemdegi eń bedeldi tehnologiialyq institýttardyń biri — EPFL-ge (Shveitsariia) «Biohimiialyq injeneriia» mamandyǵyna, sondai-aq Groningen ýniversitetine (Niderland) shaqyrtý aldy.
Arailym Muhajan (№92 mamandandyrylǵan litsei), matematika jáne fizika boiynsha halyqaralyq olimpiadalardyń jeńimpazy, birden úsh iri ýniversitetten shaqyrtý aldy: DePauw University (AQSh), Saint Louis University (AQSh) jáne Duke Kunshan University (QHR).
Janel Ten (№22 mektep-gimnaziia), frantsýz tili boiynsha respýblikalyq olimpiadanyń júldegeri, Strasbýrg ýniversitetine (Frantsiia) oqýǵa qabyldandy.
Muhamedjan Tóleýbek (№140 gimnaziia), robototehnikadan halyqaralyq jarystardyń júldegeri, South China University of Technology ýniversitetiniń «Jasandy intellekt» innovatsiialyq baǵytyna tústi.
Arailym Muhametqali (№92 mamandandyrylǵan litsei) Massachusetts University (AQSh), Suffolk University (AQSh) jáne The Hong Kong Polytechnic University (Gonkong) ýniversitetterinen shaqyrtý aldy.
Eýropa jáne Aziia baǵyttarynda Almaly aýdanynyń túlekteri de joǵary belsendilik kórsetýde (31 oqýshy).
Áýezov aýdanynda biylǵy 3099 túlektiń 23-i bedeldi ýniversitetterdiń granttaryn alýǵa maqsatty túrde daiyndalǵan. Qazirgi tańda aýdan boiynsha halyqaralyq tizimderde 134 shaqyrtý tirkelgen. Eń tanymal baǵyttar — Gonkong pen QHR (60 oqýshy), AQSh (17), Eýroodaq elderi — Aýstriia, Chehiia, Slovakiia, Majarstan, Finliandiia, Frantsiia, Italiia (19), Túrkiia (5), Ońtústik Koreia (5) jáne Ulybritaniia (3).
Alataý aýdanynda 2859 túlektiń 28-i sheteldik joǵary oqý oryndaryna irikteýden sátti ótti. Olardyń deni Qytai (13), Chehiia (3) jáne Túrkiia (2) ýniversitetteriniń granttaryn ielendi. Sondai-aq aýdan túlekteri AQSh, Ońtústik Koreia, Japoniia jáne Ázirbaijan ýniversitetterine qabyldandy.
Naýryzbai aýdanynda 5 túlek sheteldik ýniversitetterdiń ataýly bilim granttarynyń iegeri atandy. Olar «IT» (Máskeý ýniversiteti), «Pedagogika» (City University Malaysia), «Halyqaralyq logistika jáne saýda» (Kent University, Ystambul), «Menedjment» (Karabük University) jáne «Tsifrlyq kommýnikatsiia» (Gonkong ýniversiteti) mamandyqtary boiynsha bilim alady.
Túrksib jáne Jetisý aýdandary da turaqty joǵary nátije kórsetip keledi:
Túrksib aýdanynda 11 túlek Resei (8), Qytai (2) jáne Túrkiia (1) ýniversitetterinde bilimin jalǵastyrady.
Jetisý aýdanynda №118 mektep-gimnaziiasy men №80 jalpy bilim beretin mektep túlekteri halyqaralyq básekege qabilettiliktiń joǵary deńgeiin dáleldedi: oqýshylar Qytai, Resei ýniversitetterine jáne Eýropanyń iri mádeni-ǵylymi ortalyqtarynyń biri — Venaǵa (Aýstriia) oqýǵa tústi.
