Jetisý oblysynyń ákimi Beibit Isabaev óńirdegi qoǵamdyq keńestiń jańadan qalyptastyrylǵan quramymen kezdesip, ótken jyldyń qorytyndylary men birlesken josparlaryn talqylady,- dep habarlaidy Dalanews.kz Jetisý oblysy ákiminiń baspasóz qyzmetine silteme jasap.
Memleket basshysy Qasym-Jomart Toqaev atap ótkendei, qoǵamdyq keńester memleket pen qoǵam arasyndaǵy bailanysty nyǵaitatyn mańyzdy qural ekenin tilge tiek etken oblys basshysy qoǵamdyq keńestiń jumysyn ózekti áleýmettik, ekonomikalyq jáne qoǵamdyq máselelerdiń ainalasyna shoǵyrlandyrýdyń mańyzdylyǵy týraly oiyn jetkizdi. Bul rette qoǵamdyq keńes atalǵan máselelerdi zerttep, taldap, óz usynystary men pikirlerin engizýi paidaly bolmaq.
"Sizderdi jergilikti atqarýshy organdarmen tyǵyz yntymaqtastyqta jumys isteýge shaqyramyn. Bizdiń tarapymyzdan qoǵamdyq keńesterdiń áleýetin arttyrý jáne eńbek etý úshin qolaily jaǵdailar jasaý maqsatynda qajetti qoldaý kórsetiledi. Máslihat depýtattaryn, qoǵamdyq keńes múshelerin, jergilikti atqarýshy organdardy – bárimizdi ortaq basty maqsat biriktiredi, ol – Prezidenttiń júrgizgen reformalaryn iske asyrýdy jalǵastyryp, quqyqtyq memleket, ádil qoǵam ornatý jáne halyqtyń ómir súrý sapasyn jaqsartý. Sondyqtan sizdermen ashyq, ádil, konstrýktivti dialog jasai otyryp, ózara teń dárejede qoian-qoltyq jumys isteýimiz kerek" - degen B. Isabaev Qoǵamdyq keńes múshelerine ótken jyldyq qorytyndylary men aldaǵy josparlar jaily qysqasha baiandap berdi.
Ol halyqtyń aldyndaǵy jaýapkershilikti sezine otyryp jumys atqarýdyń nátijeli bolatynyna senim bildirdi.
Óz kezeginde Qoǵamdyq keńestiń tóraǵasy Áset Qydyrmanov, «Erlik» tirek-qimyl qozǵalysy kem múgedekter qoǵamdyq birlestiginiń tóraiymy Roza Aqjarkenova, oblystyq Azamattyq alians prezidenti Dániia Qydyrbaeva, «Meiirimdi Jetisý» volonterlik front-ofisiniń jetekshisi Shyrai Samatqyzy jáne Qoǵamdyq keńestiń basqa da músheleri oilaryn ortaǵa saldy. Olar Qoǵamdyq keńes onyń árbir múshesi úshin úlken mektep, jańa tájiribe ekenin aita kele, ózara áriptestik qatynastardyń jańa kezeńinde halyqtyń senimine sai jáne usynys-tilekterin negizge ala otyryp jumys isteitinderin aitty.
Eske salsaq, Jetisý oblystyq qoǵamdyq keńes jańa quramda jumysyn 32 múshesimen bastady. Keńes quramy 72% jańartyldy. Olardyń 84,4 % - azamattyq qoǵamnyń ókilderi, iaǵni onyń ishinde úkimettik emes uiymdardyń, biznes qaýymdastyqtyń, saiasi partiialardyń, kásipodaqtyń, etno-mádeni ortalyqtardyń, BAQ-tyń, bilim berý salasynyń ókilderi de bar.
