Jetisý oblysynda Memlekettik rámizder kúnine orai barlyq aýdandar men qalalarda bir mezgilde 5 myńǵa jýyq adam qatysqan Memlekettik tý kóterý jáne Memlekettik ánurandy oryndaý patriottyq is-sharalary ótti, – dep habarlaidy Dalanews.kz
Taldyqorǵandaǵy Memlekettik Tý kóterý saltanatty rásimine oblys ákimi Beibit Isabaev, ardagerler, máslihat depýtattary, jastar, QHA ókilderi, túrli qoǵamdyq uiymdar, qala turǵyndary qatysty. Mereke aiasynda óńirde 8 myńǵa jýyq adamdy qamtyǵan 100-den astam is-shara uiymdastyryldy.
«Rámizderim – maqtanyshym!» respýblikalyq aktsiiasy aiasyndaǵy saltanatty shara Taldyqorǵanda «Jastar» saiabaǵyndaǵy Tý tuǵyrynyń janynda ótti. Áskeri orkestrdiń súiemeldeýimen áskeri qyzmetshiler Memlekettik tý men Memlekettik Eltańbany alyp shyqty. Munan soń Memlekettik Tý kóterý rásimi ótip, Memlekettik ánuran shyrqaldy.
Is-shara patriottyq sherýmen jalǵasyp, oǵan qoldaryna Memlekettik Tý men jalaýshalar ustaǵan mádeniet, sport, bilim berý qyzmetkerleri, QHA ókilderi, jastar, eriktiler, áskeri qyzmetshiler jáne basqa da niet bildirýshiler qatysty. Sherýge qatysýshylar «Jastar» saiabaǵynan ortalyq alańǵa deiin N.Nazarbaev dańǵylymen júrip ótip, olardy «Kók týdyń jelbiregeni!» patriottyq aktsiiasynyń qatysýshylary qarsy aldy.
Merekeniń sońy kontserttik baǵdarlamaǵa ulasyp, «Óz elim», «Atameken» patriottyq ánderi oryndaldy.
Saltanatty patriottyq is-sharalarǵa qatysýshylar pikirlerin bildirdi. Solardyń biri oblystyq ardagerler keńesiniń tóraǵasy Ermek Kelemseiit:
- Memlekettik rámizder bizdiń búkil tarihymyzdy beineleidi, bul – Táýelsizdigimizdiń atribýttary. Rámizder qabyldanǵan kezde qandai baqytty, maqtan tutar sátterdi bastan keshkenimizdi sózben aityp jetkize almaimyn. Búgingi is-sharaǵa halyq kóp jinaldy, mundai merekeler jastardyń boiynda patriotizmdi qalyptastyrýda, jalpy halyqtyń rýhyn nyǵaitýda mańyzdy ról atqarady, - dep atap ótti ol.
Óskeleń urpaqtyń ókilderi de mereke týraly oi qosty.
- Búgin men memlekettik rámizder kúnine arnalǵan saltanatty is-sharalarǵa alǵash ret qatysyp otyrmyn. Bul – men úshin óte qyzyqty ári qýanyshty. Biz, balalar, óz tarihymyzdy jaqsy bilip, bilimimizdi jetildirip, osyndai patoriottyq is-sharalarǵa jii qatysýymyz kerek dep sanaimyn. Men bolashaqta politsiiada qyzmet etkim keledi, sóitip tártiptiń saqtalýyna úlesimdi qosamyn,-deidi Taldyqorǵan qalasyndaǵy Baqtybai Jolbarysuly atyndaǵy №18 mektep-litseiiniń 7 «B» kadet synybynyń oqýshysy Ásem Ásetqyzy.
Al osy merekede Taldyqorǵan qalasynyń № 18404 DShB áskeri bóliminiń kapitany, rota komandiri Erzat Qosyn qurmetti missiiany atqardy. Áskeri áriptesterimen birge ol memlekettik rámizderdi alyp shyqty.
- Meniń mindetim Memlekettik Eltańbany alyp shyǵý boldy. Bul – qurmetti ári óte jaýapty mindet. Óitkeni, bizdiń memlekettik rámizder – Táýelsizdigimizdiń negizi, al elimizdiń egemendigin qorǵaý – bizdiń qasietti paryzymyz. Áskeri qyzmet – meniń tańdaǵan ómirlik jolym. Qurlyq áskerleriniń áskeri institýtyn bitirgen soń Taldyqorǵanda 4 jyldan beri qyzmet etip kelemin. Turǵyndardy Memlekettik rámizder kúnimen quttyqtaimyn, barshańyzǵa beibitshilik, jaqsylyq, amandyq tileimin, - dedi E.Qosyn.
Jalpy Memlekettik rámizder kúnine orai «Rámizderim-maqtanyshym!» atty respýblikalyq aktsiia aiasyndaǵy saltanatty is-sharalar búgin oblystyń barlyq 10 aýdan-qalasynda ótkizildi. Sondai-aq «Týymyz tórimizde» aktsiiasy aiasynda turǵyndar kóp qabatty úileriniń blakondaryna Memlekettik týlardy ildi. Patriottyq sherýler Taldyqorǵan qalasy men Qaratal aýdanynda, al velojarystar Sarqan jáne Kóksý aýdandarynda ótti.
Sonymen qatar mereke qarsańynda Memlekettik tý beinelengen 400 tósbelgi taratylǵan bolatyn. Oblys boiynsha memlekettik qyzmetke alǵash qabyldanǵandardan ant qabyldaý rásimderi uiymdastyryldy. Sondai-aq kitaphanalarda, mádeniet úileri men murajailarda, mektepterde, aimaqtaǵy qoǵamdyq oryndarda patriottyq taqyryptaǵy dóńgelek ústelder, tanymdyq saǵattar, poetikalyq kezdesýler, blits-saýalnamalar ótkizildi.
Atap ótsek, Memlekettik rámizder kúni aiasynda Jetisý oblysynda 8 myńǵa jýyq adamdy qamtityn túrli formattaǵy 100-den astam is-shara uiymdastyryldy.
