Óńirdegi belsendi Gúlnár Seiitqyzy Jetisý oblysy Alakól aýdanyndaǵy jol qurylysy sapasyna narazylyq bildirdi, dep habarlaidy Dalanews.kz.
“Batpaq pen qarda jol salýǵa bola ma? Elimizde janashyr azamat qaldy ma ózi? Búgin aýyldan habar keldi. Ózderińiz kórdińizder, 2 jyl shýlap júrip, 30 jyl boiy jasalmaǵan jolǵa Premer-Ministrdiń birinshi orynbasary Roman Skliar qarjy bólgen edi.”, — deidi ol.
Alaida “Za Ra Grand” JShS jol tenderin jeńip alǵanymen, tehnika joq bolǵandyqtan jumystar toqtap qalǵan. Qar jaýǵanda jol salýdy bastaǵan kompaniia sapasyz jumystar atqaryp, joldy paidalanýǵa qaýipti jaǵdai týyndap otyr.
Gúlnár Seiitqyzy jol sapasy men qarjynyń durys jumsalmaǵanyna narazylyq bildirip, elde osy máselege janashyrlyqpen qaraityn azamattardyń joq ekenin aitty.
“Oblystyq ákimdik meni bloktap tastady. Sálem aityńyzdarshy, aýyldastardan habar boldy. Qairan eńbek, qarjy bólingen”, - deidi ol.
Alaida bul Jetisý oblysynda jol qurylysy máselesine qatysty alǵashqy daý emes. Egovpress telegram arnasynyń habarlaýynsha, Taldyqorǵan qalasynda da jol jumystarynda tehnologiialyq talaptar buzylǵan.
“Oblys aýmaǵyndaǵy Aqsýat aýdanynyń ákimi jeke tekseris júrgizip, jol jumystarynda kemshilikterdi anyqtaǵan jáne barlyq jumys qaita jasalýy tiis ekenin talap etken. Al Taldyqorǵan qalasynyń ákimi Ernat Dúisenbekulynyń áreketi ázirge belgisiz”, — dep jazdy arna.
Al derekkóz bólisken videojazbada jeli qoldanýshylarynyń biri jol sapasyna qatysty naqty kemshilikterdi atap kórsetken.
“Asfaltqa mastika múlde qoldanylmaǵan. Tehnologiia buzylyp jatyr, keiin asfalt qarmen birge erip ketedi. Qujat boiynsha jumystar qabyldanady, biraq naqty baqylaý joq”, — deidi ol.
