2025 jylǵy 12 tamyz kúni saǵat 17:00-de Sarqan aýdany Ekiasha aýylyndaǵy "Kishi Basqan" ózeninde ornalasqan VB GES-2 stantsiiasynda sý qubyry jarylyp, jergilikti deńgeide apat boldy. Apat videosy áleýmettik jelide tarap, keibir turǵyndardyń alańdaýshylyǵyn týdyrdy. Alaida oblystyq ákimdik naqty jaǵdai jelide taralǵan málimetterden edáýir ózgeshe ekenin aitady, dep habarlaidy Dalanews.kz.
Oqiǵa ornyna kelgen "Baskan Power" JShS-niń qaýipsizdik mamandary jedel túrde joǵarǵy sý qabyldaǵyshtan sý berýdi toqtatyp, sýdyń stantsiia aýmaǵynan tys jerge taralýynyń aldyn aldy. Ýaqytyly qabyldanǵan sharalardyń arqasynda ózen mańyndaǵy turǵyn úiler zardap shekken joq, halyq pen ekologiialyq qaýipsizdikke qater týyndaǵan joq.
"Baskan Power" JShS tehnikalyq direktory Daniiar Dosabaev bylai dep málimdedi:
"Tehnologiialyq turǵyda qubyrdyń jarylýy oryn alyp, sonyń saldarynan sý GES ǵimarattary arqyly jáne syrtqy betke shyǵaryldy. GES-tiń jedel kezekshi qyzmetkerleri elektr qýatyn ajyratyp, sý berýdi toqtatty, al saǵat 18:00-de qubyr tolyqtai sýsyzdandyryldy. Sýdy soryp shyǵarý jumystary bastaldy, búginde ǵimarat ishindegi sý tolyǵymen sorylyp shyǵaryldy, qazir apattyq-qalpyna keltirý jumystary júrgizilýde. Sý atqylaýy kezinde jergilikti halyqqa ziian kelgen joq, turǵyn úiler men qojalyqtardy sý basý bolǵan joq, ekologiialyq qaýip joq, sý tolyǵymen ózen arnasyna qaitty".
"Baskan Power" JShS-da shamamen 90 adam jumys isteidi, olardyń barlyǵy – jergilikti turǵyndar.
"Turǵyndardy tek resmi derekkózderdegi tekserilgen aqparatqa senýge jáne negizsiz dúrbeleń týdyrýy múmkin rastalmaǵan málimetterdi taratpaýǵa shaqyramyz. Barlyq qyzmetter qalypty rejimde jumys istep jatyr", degen oblys ákimdigi oqiǵa ornynan video da usyndy. Onda aldyndaǵy jelidegi videodaǵydai gúrildigen sýdan bir tamshy da joq.
