Jetisý oblysynda Bıken Rımovanyń 50 jyldyq mereıtoıyna oraı Halyqaralyq teatr festıvali ótedi

Qarakóz Amantaı 05 qyr. 2025 10:34

Jetisý oblysynyń ákimdiginiń qoldaýymen B.Rımova atyndaǵy Taldyqorǵan drama teatry 2025 jyldyń 12 qyrkúıek kúni 50 jyldyq mereıtoıyn atap ótýdi josparlap otyr, dep habarlaıdy Dalanews.kz.

Atalǵan shara aıasynda Halyq ártisi, KSRO jáne Qazaqstannyń Memlekettik syılyǵynyń ıegeri, Qyrǵyzstannyń eńbek sińirgen mádenıet qaıratkeri, kórnekti teatr jáne kıno aktrısasy Rımova Bıken Yrymqyzy atyndaǵy «BIKEN» III Halyqaralyq teatr festıvalin ótkizý josparlanýda.

Festıváldiń maqsaty – teatr ujymdary arasyndaǵy shyǵarmashylyq baılanysty nyǵaıtý jáne halyqaralyq teatr úderisine ıntegrasıalaý. Qazaqtyń kórnekti teatr jáne kıno aktrısasy Bıken Yrymqyzyn máńgi este qaldyrý. Estetıkalyq deńgeıdi arttyrý jáne kásibı qarym-qatynas qurý, seriktestik pen birlesken shyǵarmashylyq jobalardyń paıda bolýyna jaǵdaı jasaý. Festıvál aıasynda jas rejıserlerdiń, akterlerdiń, dramatýrgterdiń, sýretshilerdiń jańa býynyn anyqtaý jáne qoldaý bolyp tabylady.

Festıvál 2025 jyldyń 12-17 qyrkúıekaralyǵynda ótedi. Úshinshi márte uıymdastyrylǵaly jatqan sharaǵa jalpy sany 9 teatr qatysady. Atap aıtsaq Grýzıa, Qyrǵyzstan Ózbekstan jáne elimizdiń túkpir-túkipirinen kelgen teatrlar.

Synshylar alqasy:

1. Qazaqstan Respýblıkasynyń Memlekettik syılyǵynyń eki márte ıegeri, Qyrǵyz Respýblıkasynyń Eńbek sińirgen artısi, prodússer, rejıser – Joljaqsynov Doshan Qalıuly.

2. Teatrtanýshy, ónertaný doktory, profesor, "Qurmet " ordeniń ıegeri – Nurpeıis Baqyt Kákıqyzy.

3. Teatrtanýshy, pedagog, Tatar memlekettik qýyrshaq teatrynyń kórkemdik jetekshisiniń keńesshisi, TR Mádenıet mınıstriniń keńesshisi, TR Mádenıet mınıstrliginiń Qoǵamdyq keńesiniń tóraǵasy, D.Sırazıev atyndaǵy jáne respýblıkalyq M.Djalıla atyndaǵy syılyqtardyń laýreaty – Nıaz Iglamov Raýfovıch.

4. Teatrtanýshy, ónertaný doktory, Shota Rýstavelı atyndaǵy Tbılısı memlekettik teatr jáne kıno ýnıversıtetiniń profesory – Gıorgı Skıtıshvılı.