Jetisý oblysynda óńir basshysy Beibit Isabaevtyń tóraǵalyǵymen Qazaqstan halqy Assambleiasynyń oblystyq Keńesiniń otyrysy ótti. Keńes otyrysynda Qazaqstan halqy Assambleiasynyń aldaǵy XXXIV sessiiasyna qatysý máseleleri, QHA-nyń 30 jyldyǵy aiasynda óńirde ótkiziletin is-sharalar jospary talqylandy. Oblys ákimi Birlik kúni qarsańynda «Birlik júgirisi» sporttyq júgirý, Qazaqstan halqy Assambleiasynyń alleiasynyń ashylýyn tilge tiek etti, –dep habarlaidy Dalanews.kz Jetisý oblysy ákiminiń baspasóz qyzmetine silteme jasap.
Ótken onjyldyqta Assambleia azamattyq qoǵamnyń mańyzdy institýtyna ainalǵanyn atap ótken Beibit Isabaev QHA júzege asyrylǵan, áleýmettik máselelerdi sheshýge baǵyttalǵan jobalarǵa toqtaldy.
– Ótken jyldan beri óńirde «Jomart jan» qaiyrymdylyq ortalyǵy jumys istep keledi. «Qaiyrymdylyq kerýeni» jáne «Mektepke jol» qaiyrymdylyq aktsiialary aiasynda oblysta az qamtylǵan jáne kóp balaly 7 myńnan astam otbasyǵa 30 mln. teńgege kómek kórsetildi. Al Qaratal aýdanynda ótken jyldyń qazan aiynan bastap koreialyq etnomádeni ortalyǵynyń, koreiler oblystyq qaýymdastyǵynyń jáne «Diaspora murasy» respýblikalyq qorynyń qoldaýymen 70 turǵyn úidi tabiǵi gazǵa tegin qosyldy. Onda az qamtylǵan otbasylar, qarttar men jalǵyzbasty analar turady. Isker áielder keńesimen jáne metsenattarmen birlesip oblystyq «Ainalaiyn» balalar úiiniń tárbielenýshilerin, qiyn ómirlik jaǵdaiǵa tap bolǵan Analar úiindegi, daǵdarys ortalyqtaryndaǵy áielderdi qamqorlyqqa alý boiynsha júieli jumys júrgizilýde. Ekinshi dúniejúzilik soǵysyna qatysqan ardagerler men tyl eńbekkerlerine turaqty túrde kómek kórsetiledi. Mundai jumys Assambleia óńirdiń turǵyndaryna qoldaý kórsete otyryp, birlik pen kelisimdi nyǵaitýǵa sózben emes, ispen úles qosatynyn kórsetedi, – dedi aimaq basshysy.
Keńes otyrysynda sóz sóilegen Jetisý ýniversitetiniń rektory Ermek Búribaev, oblystyq Qazaqstan halqy Assambleiasynyń qoǵamdyq orynbasary, «Oblystyq orys ortalyǵynyń» tóraiymy Larisa Kotelnikova jáne Assambleianyń jastar qanatynyń ókilderi Ekaterina Podgornova men Molýtjan Tohtahýnov atqarylǵan jumystar týraly aityp, QHA-nyń 30 jyldyǵy aiasynda josparlanǵan is-sharalardy jan-jaqty talqylady. Atap aitqanda, «Assambleia jastary» Taldyqorǵan qalasyndaǵy Til saraiynyń janyndaǵy kópqabatty úilerdiń qabyrǵasyna mereitoilyq dataǵa arnalǵan qabyrǵa sýretiniń eskizin daiyndap, 30 jyldyq aiasynda túsiriletin kórkem filmniń túsirilimi jáne tarihi kitap basyp shyǵarý jumystary júrgizilýde. Bul rette oblystyń QHA músheleri men etnomádeni birlestikteri osy úderisterdiń barlyǵyna belsene atsalysýda.
Jiyndy qorytyndylaǵan oblys ákimi Beibit Isabaev oblystyq Assambleia men jergilikti atqarýshy organdardyń tyǵyz yntymaqtastyǵy kóptegen mańyzdy mindetti sheshýge múmkindik berip otyrǵanyn aita kele, óńirdiń áleýmettik-ekonomikalyq damýynyń negizgi baǵyttaryna qysqasha toqtaldy.
– Jetisý óńiri qurylǵaly beri óńirdi gazdandyrý, turǵyn úi, mektep, densaýlyq saqtaý nysany, veterinarlyq stansy salý, jalpy infraqurylymdy damytý máselelerinde aitarlyqtai jetistikterge qol jetkizildi. Qazir aldymyzda qarjylandyrý kózderi anyqtalǵan aimaqtyń aldaǵy 2-3 jylǵa arnalǵan áleýmettik-ekonomikalyq damýynyń naqty jospary bar. Memleket basshysy atap kórsetkendei, halyqtyń nazaryn uzaq merzimdi josparlardan qaraǵanda naqty máselelerdi sheshýge baǵyttaýymyz qajet. Qazaqstan halqy Assambleiasy qyzmet etken jyldar ishinde qoǵamdyq kelisimdi, birlik pen turaqtylyqty saqtaý máselelerinde ǵana emes, áleýmettik mańyzy bar máselelerdi sheshýde de óziniń tiimdiligin aiqyn kórsetetin ómirlik mańyzdy institýtqa ainaldy. Qazaqstan halqy Assambleiasynyń HHHIV sessiiasyna belsendi qatysý arqyly oblystyq Qazaqstan halqy assambleiasy men oblystaǵy etnomádeni ortalyqtardyń ókilderi aldaǵy ýaqytta da óńirdiń damýyna eleýli úles qosatynyna senimdimin, – dedi aimaq B. Isabaev.
Jiyn sońynda etnomádeni ortalyqtardyń bir top ókiline, qoǵam qairatkerlerine, eńbek ardagerlerine, jas kóshbasshylarǵa «Qazaqstan halqy Assambleiasyna 30 jyl» merekelik medaldary tabys etildi.
