Jetisý oblysynyń aýmaǵynda shegirtke tektes ziiankesterge qarsy himiialyq óńdeý jumystary júrip jatyr,- dep habarlaidy Dalanews.kz
Búgingi kúni himiialyq óńdeý jumystary 108 146 gektar alqapta júrgizildi.
Óńirde úiirli shegirtkelerge qarsy himiialyq óńdeý jumystaryn jer ústi tásilimen, asa jeńil aviatsiiamen jáne jeńil aviatsiiamen, pilotsyz áýe júiesimen (dronmen) júrgizetin kompaniialar anyqtaldy.
Jalpy aǵymdaǵy jyly shegirtke tektes ziiankesterge qarsy himiialyq óńdeý jumystaryn 114,8 myń gektar alqapta júrgizý josparlanǵan. Onyń ishinde 74,6 myń gektary - úiirli shegirtkelerge qarsy jáne 40,2 myń gektary úiirsiz saiaq shegirtkelerge qarsy óńdeý.
Himiialyq óńdeý jumystary úshin 41 sý kózderi men 22 janar-jaǵarmai beketteri belgilendi. Ziiankesterdi anyqtaý jumystaryna 204 adam men 79 birlik avtokólik jumyldyryldy.
Oblystyq jáne aýdandyq shtabtar qurylyp, óz jumystaryn júrgizýde. Bul baǵyttaǵy jumystar aldaǵy ýaqytta da jalǵasady.
