Jetisý oblysy qurylǵannan bergi 3 jylda óńirde 11 saiabaq, 5 skver jáne 2 alleia salynǵan, olar atap aitqanda – Aqsý, Alakól, Kerbulaq, Qaratal, Panfilov aýdandarynda jáne Taldyqorǵan qalasynda. Sol siiaqty 21 saiabaqqa kúrdeli jóndeý júrgizildi, dep habarlaidy Dalanews.kz
Oblysta kógaldandyrý jumystaryna erekshe mán beriledi. 2022-2024 jyldar aralyǵynda aýdan-qalalarda 21 saiabaq kúrdeli jóndeýden ótkizilse, biyl 5 saiabaq, 2 skver, 1 alleia men 69 eskertkishke jóndeý jumystary júrgizilýde. Atap ótsek, oblys kóleminde jalpy aýmaǵy 296,3 ga bolatyn 132 saiabaq, skver, alleialar bar. Máselen, sońǵy jyldary abattandyrylǵan saiabaqtardyń biri - Sarqandaǵy «Qoitas» saiabaǵy. Nysan kezeń-kezeńimen kórkeitilip, búginde qalalyqtardyń aitýly demalys oryndarynyń birine ainalǵan.
- Sarqan qalasyndaǵy «Qoitas» saiabaǵyna jergilikti turǵyndar ǵana emes, jan-jaqtan kelgen qonaqtar da tamsana qaraidy. Kúnde keshkisin otbasymyzben serýendep, Sarqan ózeniniń jaǵalaýynda emin-erkin júrip, sergip qaitamyz, qonaqtar kelse, osynda alyp kelemiz. Balalar oiyn alańqaiynda asyr salyp, jasóspirimder sporttyq alańda fýtbol, voleibol oinaidy. Munda bári halyq igiligi úshin jasalǵan, – deidi qala turǵyny Arailym Samatqyzy.
Eske salsaq, el Prezidentiniń tapsyrmasyna sáikes Jetisý oblysynyń eldi mekenderinde bes jylda 538 myń aǵash kóshetterin otyrǵyzý josparlanǵan. 2021-2024 jyldary 418 myń aǵash egilse, sonyń ishinde sońǵy úsh jylda otyrǵyzylǵan japyraqty jáne qylqanjapyraqty aǵash sany - 292 myń. Al biyl aýdan-qalalar aýmaǵynda 120 myń kóshet otyrǵyzý josparlanǵan, búgingi kúnge sonyń 55,9 myń danasy otyrǵyzyldy. Atap ótsek, aýdan-qalalarda kóktemgi jáne kúzgi maýsymdarda turǵyndardyń qatysýymen aǵash egý jáne basqa da ekologiialyq sharalar jyl boiy «Taza Qazaqstan» aktsiiasy aiasynda belsendi túrde atqarylyp keledi. Bul rette jyl basynan bergi is-sharalarǵa óńirde 17 myńnan astam adam qatysty.
Sonymen qatar oblysta aýlalardy abattandyrý baǵytynda da júieli jumystar júrgizilýde. Máselen, 2023 jyly 56 aýla aǵymdaǵy jóndeýden ótkizilse, ótken jyly 110 aýla abattandyryldy. Al biyl taǵy 51 aýlany abattandyrý josparlanǵan. Oǵan qosa 140 kópqabatty turǵyn úidiń shatyrlary men qasbetterin (69 shatyr jáne 71 qasbet) jóndeý josparda bar. Bul rette ásirese balalar oiyn alańdarynyń jańa keiipke enip, kórkeitilgenine kópshilik erekshe riza. Sońǵy eki jylda osyndai 197 alań abattandyrylsa, biyl 76 balalar jáne sport alańyn abattandyrý josparlanýda. Solardyń ishinde Taldyqorǵan qalasyndaǵy «Ulan» shaǵyn aýdanyndaǵy balalar alańy da bar.
- Buryn alańnyń shańy shyǵyp, topyraq bolyp jatatyn. Úlken ulym dop oinaǵanda ústi-basy shań bolyp keletin. Al kishi balalarymdy aýlaǵa alyp shyqqanmen oinatatyn jer joq edi. Ótken jyly aýlamyzǵa balalar oiyn alańyn salyp, túrli átkenshekter, trenajer qurylǵylaryn ornatty, úlkender demalyp otyratyn oryn da qarastyrylǵan. Kórshi aýlalarda da jóndeý, abattandyrý jumystary júrip jatyr. Shaǵyn aýdanymyzdyń keipi biyl tutastai jańalanatynyn estip qýanyp qaldyq, - deidi kóp balaly ana Diana Toparbaeva.
