Jetisý oblysy qurylǵaly beri 30 sport nysany jańadan salynyp, 3-eýi kúrdeli jóndeýden ótkizildi. Osylaisha úsh jyl ishinde sport salasynyń infraqurylymyn jańartý deńgeii 55,8% jetti. Atap aitqanda 2022-2024 jyldar aralyǵynda eldi mekenderde 3 dene shynyqtyrý-saýyqtyrý kesheni, 7 sport kesheni, 2 kúres zaly, 10 blok-modýldi sport kesheni, 2 fýtbol maneji, 2 angar úlgisindegi sport kesheni, muz arenasy, stadion, sportshylarǵa arnalǵan turǵyn úi, ústel tennisiniń ortalyǵy, voleibol ortalyǵy jáne voleibolshylarǵa arnalǵan turǵyn úi salyndy, - dep habarlaidy Dalanews.kz Jetisý oblysy ákiminiń baspasóz qyzmetine silteme jasap.
Sol siiaqty Kóksý, Sarqan aýdandary men Taldyqorǵan qalasyndaǵy stadiondarǵa kúrdeli jóndeý júrgizildi. Sonyń arqasynda halyqtyń 1000 adamǵa shaqqandaǵy sport infraqurylymymen qamtamasyz etilý kórsetkishi 64,1%-ǵa jetti.
Ótken jyly iske qosylǵan nysandardyń ishinde «Jetisý» kásibi voleibol klýbyna arnalǵan Qazaqstanda balamasy joq zamanaýi voleibol ortalyǵyn, sondai-aq sportshylarǵa arnap investor salǵan tórt qabatty turǵyn úidi erekshe ataýǵa bolady. Ondaǵy eki bólek jattyǵý zalynda «Jetisý» KVK erler, áielder komandalarynyń negizgi quramy jáne jastar dýbl-quramdary jattyǵady. Áielder komandasynyń voleibolshylary ózderiniń voleibol bazasynyń bolýy olardyń biylǵy jylǵy Qazaqstan chempionatynda jeńiske jetýine zor yqpal etkenin aitady
- Taldyqorǵanda kásibi voleiboldy odan ári damytý úshin tamasha jaǵdai jasalyp, kómek kórsetilip otyr. Bizdiń óz zamanaýi jattyǵý bazamyzdyń bolǵany bizge úlken kómek boldy. Biz sátsizdikte de, jeńiste de birge boldyq, sol uiymshyldyǵymyzdyń arqasynda, jasalǵan jaǵdailardyń nátijesinde «Jetisý» klýbynyń burynǵy dańqyn qaitaryp ala aldyq, - deidi komanda kapitany Karina Denisova.
Eske salsaq, Jetisý» voleibol qyzdar komandasy 2024-2025 jyldardaǵy maýsymda úshinshi jeńisine qol jetkizip otyr, iaǵni QR Chempionatyn toǵyzynshy ret, sol siiaqty Kýbogyn da toǵyzynshy márte, Sýperkýbokty tórtinshi márte utyp aldy.
Óńirdiń sport klasterin tolyqtyrǵan taǵy bir zamanaýi nysan – Taldyqorǵanda investordyń qarajaty esebinen salynǵan oblystaǵy tuńǵysh ústel tennisi ortalyǵy. Nysan halyqaralyq talaptar men standarttarǵa sáikes keledi. Onda erekshe qajettilikteri bar sportshylar úshin barlyq jaǵdai jasalǵan.
Sondai-aq 31 myń halqy bar Tekeli qalasynda ótken jyly ashylǵan dene shynyqtyrý-saýyqtyrý kesheni de qazirgi kezde jemisti jumys istep tur, mundai keshen tipti oblys ortalyǵynda joq.
- Búginde munda aýyr atletika, boks, basketbol, sadaq atý, dziýdo, kombat dziý-dziýtsý, karate shinkiokýshinkai siiaqty sporttyń 7 túrinen 551 sportshy jattyǵady. Sonyń ishinde men basketboldan jattyqtyrýshymyn. Osy ǵimarat qazir Tekeli qalasynyń Olimpiadalyq rezervtegi mamandandyrylǵan balalar men jasóspirimder sport mektebiniń tárbielenýshileri úshin myqty baza bolyp otyr. Balalarmen jańa oiyn zalynda jattyǵý ótkizemiz. Sport kesheni ashylǵannan beri oblys jáne Qazaqstan chempionattaryna qatysyp jaqsy nátije kórsettik. Alda da áli talai jeńisti jol bar dep oilaimyn. Mundai zamanaýi jabdyqtalǵan nysandar ásirese jastardy salaýatty ómir saltyn ustanýǵa, sportqa baýlýǵa asa qajet, - deidi jattyqtyrýshy Álibek Muqanov.
Al biyl oblysta 3 sporttyq nysandy salýǵa jergilikti biýdjetten qarjy bólingen. Bul rette Alakól aýdany Lepsi aýylynda 160 oryndy dene shynyqtyrý-saýyqtyrý kesheni men jataqhananyń qurylysy júrgizilip jatyr. Sondai-aq osy jyly Alakól aýdany Qabanbai aýylyna 80 oryndy sporttyq keshen turǵyzylady. Taldyqorǵan qalasynda kórkem gimnastikaǵa arnalǵan zaldyń qurylysy bastalǵan. Oǵan qosa biylǵy naýryz aiynan Qaratal aýdany Kálpe aýylynda investor esebinen blokty-modýldi ústel tennisi kesheni salyna bastady. Sonymen qatar Qaratal aýdany Almaly aýylynda, Kerbulaq aýdany Qarashoqy, Sarybastaý aýyldarynda, Kóksý aýdany Talapty aýylynda jyldam salynatyn blokty-modýldi sport keshenderin salý josparda bar.
Jalpy óńirde buqaralyq sportpen qatar balalar men jasóspirimder sportyna da erekshe mán berilip keledi.
Sonymen 2022 jyldan beri oblysta boks jáne dziýdo boiynsha olimpiada rezerviniń mamandandyrylǵan balalar men jasóspirimder sport mektepteri, olimpiadalyq, olimpiadalyq emes sport túrlerinen joǵarǵy sport sheberligi mektepteri, «Jetisý» voleibol, hokkei, ulttyq sport túrlerinen klýbtar ashyldy. Qysqy sport túrlerin damytýda maqsatynda 2024 jyldyń basynan Taldyqorǵan qalasynyń №1 olimpiadalyq rezervtegi mamandandyrylǵan balalar men jasópirimder mektebinde kerling, short trek jáne shaibaly hokkei boiynsha bólimsheler ashyldy. Sonymen qatar sáýir aiynda Taldyqorǵan qalasynyń №1 ORMBJM-synda jáne Eskeldi, Kóksý aýdandarynyń sport mektepterinde shaibaly hokkei sport túrinen bólimsheler ashyldy. Oǵan qosa oblys ákiminiń tapsyrmasy boiynsha óńirde alǵash ret biyldan bastap aýla jáne mektep komandalary arasynda fýtbol, voleibol jáne basketboldan oblystyq balalar týrnirin ótkizýdi bastaimyz. Qazirgi kezde oblys boiynsha 560-tan astam komandadan ótinimder qabyldandy. Irikteý jarystary 19 sáýirde bastalady, al oblystyq kezeńdi maýsym aiynda ótkizý josparlanǵan.
