Energetika ministrligi "Qarashyǵanaq ken ornynyń jumysyna bailanysty elde suiytylǵan gaz tapshylyǵy týyndaidy" degen aqparat shyndyqqa janaspaitynyn málimdedi, dep habarlaidy dalanews.kz.
Vedomstvo málimetinshe, eldiń batys óńirlerine gaz turaqty jetkizilip jatyr. Ol jergilikti turǵyndardyń, kólikterdiń jáne tranzittik kóliktiń suranysyn tolyq qamtamasyz etedi.
Ministrlik Atyraý munai óńdeý zaýytyndaǵy josparly jóndeý jumystary bastalmai turyp-aq jetkizý baǵyttaryn qaita qarap, qosymsha qor bólgen. Bul profilaktikalyq jumystar kezinde gaz tapshylyǵyna jol bermeýge múmkindik beredi.
Mańǵystaý oblysyna ákimdik maýsymda 18 myń tonna gaz suratqan. Alaida óńirge 19,5 myń tonna bólingen. Sonymen qatar, suranys artýyna bailanysty "SNPS-Aqtóbemunaigaz" AQ qorynan qosymsha 1,5 myń tonna gaz jetkizilgen. Otyn kún saiyn jóneltilip jatyr.
Al Atyraý oblysynyń ailyq qajettiligi 9 myń tonna dep eseptelse, óńirge 11,6 myń tonna suiytylǵan gaz bólingen. Ministrlik bul kólem óńir suranysyn tolyq óteitinin málimdedi.
