Bıyl Jetisaı aýdanynyń sharýalary 48226 gektarǵa aq altyn dánin seýip, qyrmanǵa 126 myń tonna maqta jınady.
Sharýalar orta eseppen ár gektardan 26,2 sentnerden ónim alǵan. Óndirilgen ónim kólemi byltyrǵy jylmen salystyrǵanda 2609 tonnaǵa artyq bolyp otyr.
Bıylǵy jyly Jetisaı aýdanynda 7 maqta zaýyty toqtaýsyz jumys istedi. Iaǵnı bul zaýyttar aq altyndy qabyldap alyp, qaıta óńdeý isine mán berip keledi. Sondaı-aq, óńirde maqtany qaıta óńdeýden ótkizetin shaǵyn sehtar da jumysyn jandandyrý ústinde. Solardyń biri – Jetisaı aýdany Qyzylqum aýyl okrýgi Jalpaqqum aýylyndaǵy jeke kásipker Ómirzaq Mahambetovtiń maqta tútý sehy. Atalǵan shaǵyn seh 2015 jyly iske qosylǵan. Búginde munda maqta jáne jún tútýge arnalǵan 5 qondyrǵy jumys istep tur.
«2015 jyly otbasymyzben osy kásipti ashý úshin «Kaspıı» bankten 3,5 mln teńge nesıe aldyq. Qazirgi aılyq tabysymyz jaman emes. Maqta jınaý naýqanynda jumysymyz jaqsy júredi. Qystyń kúnderi suranystar saıabyrsıdy. Desek te, jumysymyz júıeli. Aldaǵy ýaqytta úıimizge jaqyn mańnan 50 sottyq jer telimin alyp, sehymyzdy úlkeıtsek dep otyrmyz», — deıdi Ómirzaq Mahambetov.
Shaǵyn sehtyń ónimderin negizinen Jetisaı aýdanynyń turǵyndary tutynady eken. Kórpe-jastyqqa, qyz jasaýyna qajetti maqta ónimderiniń bári osynda ázirlenedi. 5 balashaǵaly otbasyn asyrap otyrǵan shaǵyn sehtyń qazirgi ornalasqan jeriniń qujattary joq eken. Osy olqylyqtyń ornyn toltyrý úshin Mahambetovter otbasy Qyzylqum aýyl okrýginiń ákimdiginen kásipkerlik maqsatynda jer telimine suranys joldaǵan. Ákimdiktegiler bul máseleni jaqyn arada sheship berýge tyrysamyz dep otyr
