Diqanshylyqty kásip etken sharýa sáýir aiynda eginshiligin bastap, qajetti agrotehnikalyq sharalardyń der kezinde jasalýynyń nátijesinde pisip-jetilgen qarbyzdan shamamen 300 tonnaǵa jýyq ónim alynady dep josparlap otyr.
– Biyl aýdanymyzdyń klimaty diqanshylyqqa qolaisyzdaý bolǵanymen táýekel jasap jyldaǵy ýaqytta eginshilikti bastadyq. 6 gektarǵa plenkaly, 5 gektarǵa plenkasyz qarbyz ektik. Egistik alqabynyń ár gektaryna shamamen 1 mln. teńgeden shyǵyn shyǵardyq. Áitse de, aýa-raiynyń qarasqandyǵynan ónimimizdi saýdalap otyrmyz. Taǵy 15 kúnde plenkasyz qarbyzymyz da daiyn bolady, – deidi O. Esbolatov.
Jetisailyq sharýalar biyl 79,3 myń gektar sýarmaly jerdiń 45,5 myń gektaryna maqta shitin sepse, 19,6 myń gektar jerge baqsha, 5 myń gektar jerge dándik júgeri, 2,9 myń gektar jerge kókónister men 5,3 myń gektaryna mal azyqtyq daqyldaryn ekken.
Qazirgi tańda aýdanda baqsha daqyldarynan ónim jinaý naýqany júrgizilýde. Jinalǵan 24,5 myń tonna baqsha ónimderiniń 11,9 myń tonnasy qarbyz bolsa 12,5 myń tonnasy – qaýyn. Jiyn-terim naýqanynyń sońyna deiin baqshadan 525 myń tonna ónim alý josparlanyp otyr. Baqsha daqyldarynyń ónimderi negizinen Resei, Belarýs memleketterimen qatar elimizdiń Astana, Almaty, Shymkent sekildi iri qalalaryna, suranys bolǵan ózge de oblys ortalyqtaryna jóneltiledi.
Aita keteiik, qarbyz ónimderiniń baǵasy alǵashynda kelisine 90 teńgeden bastalsa, qazir 70-80 teńge aralyǵynda satylýda.
