Túrkistan oblysyndaǵy jańadan qurylǵan Jetisai aýdanynyń ákimi taǵaiyndaldy. QR Prezidenti Ákimshiliginiń jáne aýdandyq máslihattyń kelisimi boiynsha oblys ákimi Janseiit Túimebaevtyń ókimimen bul qyzmetti Jamantai Qanaiuly Beisenbaev atqaratyn boldy.
Sonymen birge, osy kúni osyndai sheshimder aiasynda meritokratiia qaǵidatyna sai Maqtaaral aýdanynyń ákimi laýazymyn Bahyt Násirhanuly Asanov óz mindetine aldy.
– Sizderdi jańa Jetisai aýdanynyń qurylǵanymen quttyqtaimyn. Endi tyń qarqynmen memlekettik baǵdarlamalardy sapaly túrde júzege asyrýǵa jumys isteýlerińiz kerek. Aýdan ákimine júkteler eń basty úsh tapsyrma bar. Olar: saiasi turaqtylyqty saqtaý, aýdan turǵyndarynyń birligin nyǵaitý jáne ekonomikalyq turaqtylyqty saqtai otyryp ósimge qol jetkizý. Osy sharýalar sapaly oryndalsa, bári jaqsy bolady. Shekara mańynda ornalasqandyqtan Jetisaidyń strategiialyq mańyzy óte joǵary. Damý múmkindigi de mol. Ásirese, aýyl sharýashylyǵyn júielep damytyp, kásippen shuǵyldanamyn deýshilerge qoldaý kórsetilsin. Atqarylatyn sharýa óte kóp. Iske sát! – dedi aimaq basshysy.
J.Q.Beisenbaev 1958 jyly týylǵan, bilimi joǵary, mamandyǵy boiynsha biliktiligi ǵalym agronom, zańger. Eńbek jolyn 1982 jyly Almaty oblysy Qaskelen aýdany «Prigorodnyi» keńsharynyń aǵa agronomy retinde bastaǵan.
1984-2018 jyldary aýyl sharýashylyǵy qyzmetkerleri kásipodaǵynyń Jetisai aýdandyq komitetiniń hatshysy, «Krasnaia zvezda» keńsharynyń partiia komitetiniń hatshysy, Ońtústik Qazaqstan oblysy Jetisai aýdany ákiminiń birinshi orynbasary, Maqtaaral aýdany aýylsharýashylyǵy basqarmasy bastyǵynyń orynbasary, Maqtaaral aýdany Jetisai qalasynyń ákimi, Maqtaaral aýdany ákiminiń orynbasary, oblys ákiminiń keńesshisi laýazymdaryn atqarǵan.
2018 jyldyń sáýir aiynan bastap Ońtústik Qazaqstan oblysy Maqtaaral aýdanynyń ákimi laýazymynda qyzmet etip keldi.
Kezekti basqosýda, Janseiit Túimebaev Maqtaaraldyń ákimin tanystyrý kezinde, maqtaly ólkede aldaǵy ýaqytta atqarylar istiń kóptigine toqtalyp, shekaralyq aýdandaǵy birqatar máseleler budan bylai tezirek sheshimin tabatynyna senim bildirdi.
– Jańadan Maqtaaral aýdanynyń qurylǵanyna el riza. Endi elge qyzmet kórsetý, áleýmettik máselelerdi sheshý jeńildeidi. Turǵyndar qujat retteý úshin alysqa shabylmaidy. Taǵy aita keterlik jai, sizder jańadan qurylǵan Túrkistan oblysyndaǵy Maqtaaral aýdanynyń turǵynysyzdar. Bul da úlken mártebe ári jaýapkershilik. Elbasy Túrkistan oblysyna basa mán berip otyr. Túrkistan Túrki áleminiń kóshbasshysyna ainalýy úshin sizder de úles qosýlaryńyz kerek. Kórshi elmen shektesetin aýdanǵa úlken senim ári jaýapkershilik júkteledi. Jańa ákim aýdannyń áleýmettik-ekonomikalyq jaǵdaiyn kóterip, el senimin aqtaidy degen oidamyn. Jumystaryńyzǵa sáttilik tileimin! – dedi J.Túimebaev.
Sonymen birge, aýdannyń damýyna óz úlesin qosqan burynǵy ákim Jamantai Beisenbaevqa alǵysyn bildirip, aldaǵy qyzmetinde tabys tiledi.
B.N.Asanov 1962 jyly týylǵan, bilimi joǵary, mamandyǵy boiynsha biliktiligi injener-qurylysshy.
Eńbek jolyn 1984 jyly JMK «Jetisai aýyl qurylys» trestiniń normalaýshysy retinde bastaǵan.
1986-2011 jyldary Lenin atyndaǵy keńshardyń gazdandyrý jónindegi jumystardy tehnikalyq qadaǵalaýshysy, Lenin atyndaǵy keńshardyń qurylys bóliminiń sheberi, «Kóksý» keńsharynyń aǵa proraby, «Jibek joly» saýda bazasy direktorynyń orynbasary, Respýblikalyq jastar kásipkerligin qoldaý qory direktorynyń orynbasary, Almaty qalalyq jastar kásipkerligin qoldaý jónindegi qordyń Frýnze aýdandyq filialy direktory, Shymkent qalalyq ákimshiliginiń tehnikalyq inspektsiiasynyń inspektory, Shymkent qalalyq ákimshiliginiń tehnikalyq inspektsiiasy bastyǵynyń orynbasary, Ońtústik Qazaqstan oblysy Jetisai aýdany Jyly sý selolyq okrýginiń ákimi, Ońtústik Qazaqstan oblysy Jetisai qalasynyń ákimi laýazymdaryn atqarǵan.
2011 jyldyń shilde aiynan bastap Ońtústik Qazaqstan oblysy Maqtaaral aýdany ákiminiń orynbasary laýazymynda qyzmet etip keldi.
Túrkistan oblysy ákiminiń baspasóz qyzmeti
