تۇركىستان وبلىسىنداعى جاڭادان قۇرىلعان جەتىساي اۋدانىنىڭ اكىمى تاعايىندالدى. ق ر پرەزيدەنتى اكىمشىلىگىنىڭ جانە اۋداندىق ءماسليحاتتىڭ كەلىسىمى بويىنشا وبلىس اكىمى جانسەيىت تۇيمەبايەۆتىڭ وكىمىمەن بۇل قىزمەتتى جامانتاي قاناي ۇلى بەيسەنبايەۆ اتقاراتىن بولدى.

سونىمەن بىرگە، وسى كۇنى وسىنداي شەشىمدەر اياسىندا مەريتوكراتيا قاعيداتىنا ساي ماقتاارال اۋدانىنىڭ اكىمى لاۋازىمىن باحىت ءناسىرحان ۇلى اسانوۆ ءوز مىندەتىنە الدى.

– سىزدەردى جاڭا جەتىساي اۋدانىنىڭ قۇرىلعانىمەن قۇتتىقتايمىن. ەندى تىڭ قارقىنمەن مەملەكەتتىك باعدارلامالاردى ساپالى تۇردە جۇزەگە اسىرۋعا جۇمىس ىستەۋلەرىڭىز كەرەك. اۋدان اكىمىنە جۇكتەلەر ەڭ باستى ءۇش تاپسىرما بار. ولار: ساياسي تۇراقتىلىقتى ساقتاۋ، اۋدان تۇرعىندارىنىڭ بىرلىگىن نىعايتۋ جانە ەكونوميكالىق تۇراقتىلىقتى ساقتاي وتىرىپ وسىمگە قول جەتكىزۋ. وسى شارۋالار ساپالى ورىندالسا، ءبارى جاقسى بولادى. شەكارا ماڭىندا ورنالاسقاندىقتان جەتىسايدىڭ ستراتەگيالىق ماڭىزى وتە جوعارى. دامۋ مۇمكىندىگى دە مول. اسىرەسە، اۋىل شارۋاشىلىعىن جۇيەلەپ دامىتىپ، كاسىپپەن شۇعىلدانامىن دەۋشىلەرگە قولداۋ كورسەتىلسىن. اتقارىلاتىن شارۋا وتە كوپ. ىسكە ءسات! – دەدى ايماق باسشىسى.



ج.ق.بەيسەنبايەۆ 1958 جىلى تۋىلعان، ءبىلىمى جوعارى، ماماندىعى بويىنشا بىلىكتىلىگى عالىم اگرونوم، زاڭگەر. ەڭبەك جولىن 1982 جىلى الماتى وبلىسى قاسكەلەن اۋدانى «پريگورودنىي» كەڭشارىنىڭ اعا اگرونومى رەتىندە باستاعان.

1984-2018 جىلدارى اۋىل شارۋاشىلىعى قىزمەتكەرلەرى كاسىپوداعىنىڭ جەتىساي اۋداندىق كوميتەتىنىڭ حاتشىسى، «كراسنايا زۆەزدا» كەڭشارىنىڭ پارتيا كوميتەتىنىڭ حاتشىسى، وڭتۇستىك قازاقستان وبلىسى جەتىساي اۋدانى اكىمىنىڭ ءبىرىنشى ورىنباسارى، ماقتاارال اۋدانى اۋىلشارۋاشىلىعى باسقارماسى باستىعىنىڭ ورىنباسارى، ماقتاارال اۋدانى جەتىساي قالاسىنىڭ اكىمى، ماقتاارال اۋدانى اكىمىنىڭ ورىنباسارى، وبلىس اكىمىنىڭ كەڭەسشىسى لاۋازىمدارىن اتقارعان.

2018 جىلدىڭ ءساۋىر ايىنان باستاپ وڭتۇستىك قازاقستان وبلىسى ماقتاارال اۋدانىنىڭ اكىمى لاۋازىمىندا قىزمەت ەتىپ كەلدى.

كەزەكتى باسقوسۋدا، جانسەيىت تۇيمەبايەۆ ماقتاارالدىڭ اكىمىن تانىستىرۋ كەزىندە،  ماقتالى ولكەدە الداعى ۋاقىتتا اتقارىلار ءىستىڭ كوپتىگىنە توقتالىپ، شەكارالىق اۋدانداعى ءبىرقاتار ماسەلەلەر بۇدان بىلاي تەزىرەك شەشىمىن تاباتىنىنا سەنىم ءبىلدىردى.

– جاڭادان ماقتاارال اۋدانىنىڭ قۇرىلعانىنا ەل ريزا. ەندى ەلگە قىزمەت كورسەتۋ، الەۋمەتتىك ماسەلەلەردى شەشۋ جەڭىلدەيدى. تۇرعىندار قۇجات رەتتەۋ ءۇشىن الىسقا شابىلمايدى. تاعى ايتا كەتەرلىك جاي، سىزدەر جاڭادان قۇرىلعان تۇركىستان وبلىسىنداعى ماقتاارال اۋدانىنىڭ تۇرعىنىسىزدار. بۇل دا ۇلكەن مارتەبە ءارى جاۋاپكەرشىلىك. ەلباسى تۇركىستان وبلىسىنا باسا ءمان بەرىپ وتىر. تۇركىستان تۇركى الەمىنىڭ كوشباسشىسىنا اينالۋى ءۇشىن سىزدەر دە ۇلەس قوسۋلارىڭىز كەرەك. كورشى ەلمەن شەكتەسەتىن اۋدانعا ۇلكەن سەنىم ءارى جاۋاپكەرشىلىك جۇكتەلەدى. جاڭا اكىم اۋداننىڭ الەۋمەتتىك-ەكونوميكالىق جاعدايىن كوتەرىپ، ەل سەنىمىن اقتايدى دەگەن ويدامىن. جۇمىستارىڭىزعا ساتتىلىك تىلەيمىن! – دەدى ج.تۇيمەبايەۆ.

سونىمەن بىرگە، اۋداننىڭ دامۋىنا ءوز ۇلەسىن قوسقان بۇرىنعى اكىم جامانتاي بەيسەنبايەۆقا العىسىن ءبىلدىرىپ، الداعى قىزمەتىندە تابىس تىلەدى.

ب.ن.اسانوۆ 1962 جىلى تۋىلعان، ءبىلىمى جوعارى، ماماندىعى بويىنشا بىلىكتىلىگى ينجەنەر-قۇرىلىسشى.

ەڭبەك جولىن 1984 جىلى جمك «جەتىساي اۋىل قۇرىلىس» ترەستىنىڭ نورمالاۋشىسى رەتىندە باستاعان.

1986-2011 جىلدارى لەنين اتىنداعى كەڭشاردىڭ گازداندىرۋ جونىندەگى جۇمىستاردى تەحنيكالىق قاداعالاۋشىسى، لەنين اتىنداعى كەڭشاردىڭ قۇرىلىس ءبولىمىنىڭ شەبەرى، «كوكسۋ» كەڭشارىنىڭ اعا پرورابى،  «جىبەك جولى» ساۋدا بازاسى ديرەكتورىنىڭ ورىنباسارى، رەسپۋبليكالىق جاستار كاسىپكەرلىگىن قولداۋ قورى ديرەكتورىنىڭ ورىنباسارى، الماتى قالالىق جاستار كاسىپكەرلىگىن قولداۋ جونىندەگى قوردىڭ فرۋنزە اۋداندىق فيليالى ديرەكتورى، شىمكەنت قالالىق اكىمشىلىگىنىڭ تەحنيكالىق ينسپەكسياسىنىڭ ينسپەكتورى، شىمكەنت قالالىق اكىمشىلىگىنىڭ تەحنيكالىق ينسپەكسياسى باستىعىنىڭ ورىنباسارى، وڭتۇستىك قازاقستان وبلىسى جەتىساي اۋدانى جىلى سۋ سەلولىق وكرۋگىنىڭ اكىمى، وڭتۇستىك قازاقستان وبلىسى جەتىساي قالاسىنىڭ اكىمى لاۋازىمدارىن اتقارعان.

2011 جىلدىڭ شىلدە ايىنان باستاپ وڭتۇستىك قازاقستان وبلىسى ماقتاارال اۋدانى اكىمىنىڭ ورىنباسارى لاۋازىمىندا قىزمەت ەتىپ كەلدى.

تۇركىستان وبلىسى اكىمىنىڭ باسپا ءسوز قىزمەتى