Jer máselesine qatysty Call ortalyqqa 12 500-ge jýyq qońyraý
– Halyqtyń usynystary men pikirlerin jinaqtap, komissiiaǵa jetkizip otyrý úshin Call ortalyq quryldy. Call ortalyqqa 14 mamyrdan bastap búgingi kúnge deiin 12 myń 458 qońyraý tústi. Atap ótetin jait, osy ortalyqqa túsken saýaldardyń basym kópshiligi 9583 nemese 77 paiyzy jeke turǵyn úi qurylysyna bailanysty bolyp otyr. Sheteldikterge jerdi jalǵa berý, qazaqstandyqtarǵa jeke menshikke berý, taǵy da basqa jerge qatysty suraqtarǵa qatysty 555 qońyraý shalynǵan, iaǵni, jalpy saýaldyń 4,4 paiyzy, – dep habarlady E.Nysanbaev.
Óńirler boiynsha eń kóp saýal Ońtústik Qazaqstan oblysynan túsken – 17,6 paiyz. Sondai-aq, Pavlodar oblysynan 10,3 paiyz qońyraý shalynǵan.
– Al qalǵan 2337 qońyraý ár túrli azamattardyń óziniń jeke máselesine bailanysty. Call ortalyqqa Atyraý oblysynan nebári 70 qońyraý shalynǵan. Onyń ishinde 55 qońyraý jeke turǵyn úi qurylysyna bailanysty. Budan basqa, jer reformasyna bailanysty Jerturaly.kz saity jumys istep jatyr, – dedi E.Nysanbaev.
Saitqa búgingi kúnge deiin 947 suraq kelip túsken. Onyń 756-syna tiisti jaýaptar daiyndalyp, saitqa ornalastyryldy. Al qalǵan 191 suraq boiynsha búginde jaýaptar ázirlenip jatyr.
– Osy suraqtarǵa taldaý jasasaq, jeke turǵyn úi qurylysy jerine bailanysty 114, aýyl sharýashylyǵyna qatysty 357, sheteldikterge aýyl sharýashylyǵy jerin jalǵa berý máselesi boiynsha 176, basqa da suraqtarǵa bailanysty 300 hat kelip tústi. Sonymen birge, oblystyq ákimdikterdiń qoǵamdyq keńesteri komissiianyń óńirlerge filialy retinde tiisti jumys istep jatyr. Qoǵamdyq keńester halyqpen oblys, aýdan deńgeiinde barlyǵy 1200-den astam kezdesý ótkizdi. Kezdesýge barlyǵy 70 myńnan astam adam qatysty, – dedi vitse-ministr.
Aita ketsek, búgin H.Dosmuhamedov atyndaǵy Atyraý memlekettik ýniversitetinde QR Premer-ministriniń orynbasary – aýyl sharýashylyǵy ministri Asqar Myrzahmetovtyń tóraǵalyǵymen Jer reformasy jónindegi komissiia músheleriniń Atyraý oblysy halqymen kezdesýi ótip jatyr. Segizinshi otyrysqa komissiianyń 25 múshesi qatysyp otyr.
Kezdesýge aýyl sharýashylyǵy taýaryn óndirýshiler men kásipkerler, salalyq odaqtar men qaýymdastyqtar, barlyq deńgeidegi qoǵamdyq keńes músheleri, partiialyq jáne kásipodaq uiymdary, ortalyq jáne jergilikti atqarýshy organdar qatysyp, óńir aýdandarynyń turǵyndary selektorlyq rejimde bailanysqa shyǵyp otyr. Sonymen qatar, «Bnews.kz» saitynda tikelei efir uiymdastyrylǵan.
Eske sala ketsek, buǵan deiin komissiianyń Astanada tórt, al úsh kóshpeli otyrysy Aqmola, Almaty jáne Qyzylorda oblystarynda ótken bolatyn.
Aiymgúl ÁBILEVA
