Joba men aksıa bıyl Qazaqstan Respýblıkasy Aqparat jáne qoǵamdyq damý mınıstrliginiń qoldaýymen ótedi.
"Jeńimpazdar" - 2014 jylǵy 9 mamyrdan bastap Uly Otan soǵysynyń ardagerleri men tyl eńbekkerleri týraly 3,5 myńnan asa oqıǵa jarıalanǵan joba. Qazaqstan men ózge elderdiń oqyrmandary jarty ǵasyrdan asa ýaqyt buryn maıdanǵa attanǵan atalary, ájeleri, dostary týraly aqparat jiberedi.
Qazaqstandyq UOS ardagerler qory Tengrinews.kz negizin qalaýshy jáne Alash Media Group holdıńiniń basshysy Batyr Qazybaevtyń bastamasymen júzege asty.
"Joba qazaqstandyq ardagerler týraly taǵy bir qordy qalyptastyrý jáne ony atalaryn eske alatyn, qurmetteıtin adamdardyń kómegimen júzege asyrý úshin dúnıege keldi. Bul joba muraǵat bolady dep úmittenbeımiz. Bul - Tengrinews jáne Tengrinews oqyrmandarynyń kúshimen jınalatyn qarapaıym kartoteka. Kez kelgen adam ata-babalary, otbasyndaǵy batyrlar týraly aqparat jarıalaı alady. Soǵyspen baılanysty ár otbasy umytylmaýy kerek. Uly Otan soǵyspen baılanysty estelikterdi saqtamasaq, qalpyna keltirmesek, bolashaǵymyzdyń bir bóligin joǵaltamyz. Bul - jobanyń basty maqsaty", - dep atap ótken edi Batyr Qazybaev.
Joba oqyrmandardy Qazaqstannyń belgisiz ári tanymal emes batyrlarymen tanystyrady, ardagerlerdiń týystaryna soǵystan keıin baılanysy joǵalǵan jaqyndaryn tabýǵa kómektesedi.
Oqıǵalardyń biri aǵa leıtenant Ahmetqazy Bolatov týraly. Ol 1941 jyly Almaty qalasynan maıdanǵa attanǵan ataqty 100-shi arnaıy atqyshtar brıgadasynda bolǵan. Onyń quramynda Keńes Odaǵynyń batyry Mánshúk Mámetova da bolǵan. Ahmetqazy Bolatov 1943 jyly 15 qazanda Nevel túbindegi surapyl shaıqasqa qatysqan.
"Mánshúktiń atys pozısıasyn jaqsy bildik jáne onyń oq-dárileri taýsylǵannan keıin, basqa pýlemette turǵanyn este saqtadyq. Ol pozısıasy jaý oǵymen jabylǵansha, nemis jaıaý áskerine pýlemetten oq jaýdyrdy", - dep eske aldy ardager.
Keıin oǵan saltanatty jerleý úshin Mánshúk Mámetovanyń denesin tabý tapsyrylǵan.
"Birneshe ret jaralanǵandardyń ólimi men azaptanǵanyn kórdim. Ózim 3 ret jaralandym. Biraq bıiktiktiń basynda batyr pýlemetshiniń atys pozısıasyn izdep, Turash ekeýmizdiń Mánshúkten qalǵanyn jınap, onymen birge Nevelge barǵanymyzǵa eshteńe jetpeıdi... Bizdi sonda kútti. Saltanatty jerleý rásimi ótti. Salút toqtatyldy, Qazaqstannyń batyr qyzymen máńgige qoshtastyq. Bul 1944 jylǵy tamyzda boldy", - dep esteligin bólisti ol.
Ardager Vasılıı Gladyshevtyń qyzy týraly oqıǵaǵa da toqtalsaq, "Jeńimpazdar" jobasynyń arqasynda ol ózine qymbat adamnyń ómiri týraly bilip, Pavlodardan jańa týystar tapty.
2018 jyly joba aıasynda áıel adam Tengrinews.kz saıtyna ardager ákesi týraly aqparat jarıalaıdy. Bul anketany kórgen Vasılıı Gladyshevtyń nemeresi jaýap bergen.
"Bir jyl buryn úndeýim jarıalanǵanyn kórdim, biraq meniń armanym - ákemniń taǵdyry týraly bilýime septigin tıgizedi dep oılamadym. Mine, meniń 70 jyldyq mereıtoıym kúni jaýap keldi. Meni ákemniń nemeresi tapty. Sizderge ózimniń, aǵamnyń, balalarymnyń jáne nemerelerimniń, barlyq týysymnyń atynan beı-jaı qaramaǵandaryńyz, ıgi isterińiz úshin alǵysymdy bildirgim keledi. Úlken jumys istedińizder. Bul bizdiń urpaqtarymyz úshin mańyzdy", - dep Uly Otan soǵysy ardageriniń qyzy "Jeńimpazdar" jobasyna alǵysyn bildirdi.
Taǵy bir oqıǵa Uly Otan soǵysyna qatysqan, belgili qazaqstandyq jazýshy jáne jýrnalıs Valentın Mıhaılovıch Fılatov týraly. 2022 jylǵy qańtarda onyń týysy Elena Jýkova ınternetten ol týraly aqparat izdep, "Jeńimpazdar" jobasynan aǵasynyń anketasyn tapqan.
"Osylaısha, Valentın Fılatov týraly betke kirdim. Ol týraly aqparatty saıtqa onyń shóbere qyzdary jibergenin bildim. Sondaǵy esimderdi taǵy da izdep, Pavlodar gımnazıalarynyń birinde ótken balalar konkýrsy týraly basqa saıtty taptym. Olar onda atalarynyń ómirin sıpattaǵan. Sizderdiń maqalalaryńyz bolmasa, olardy tabý múmkindigi óte az edi. Osyndaı «kópir» bolǵandaryńyz úshin kóp raqmet", - dep bólisti Elena Jýkova redaksıasymen.
Joba aıasynda qazaqstandyq UOS ardagerleriniń urpaqtaryna vıdeoúndeýler túsirildi. Joba keıipkerleri soǵysqa qatysqandar óte jas bolsa da, barlyq qasiretti kórgenin eske alady. Ardagerler jastardyń kishipeıil jáne adal bolýyn tiledi. Qazir olardyń keıbiri aramyzda joq. Olar óskeleń urpaqtyń sportpen aınalysqanyn, rýhanı jaǵynan kúshti bolyp tárbıeleýin qalaıdy. Al ardagerlerdiń eń basty tilegi - elimizde eshqashan soǵys bolmaýy.
"Jeńimpazdardy" Qazaqstan Qorǵanys mınıstrligi "Internet-basylymdaǵy úzdik jarıalanym" nomınasıasy boıynsha marapattady. Baıqaý Uly Otan soǵysyndaǵy Jeńistiń 70 jyldyǵyna oraı ótkizildi. "Bul jumystar erekshe bolǵan soń tańdaldy ári qazirgi zamanǵa saı boldy. Sebebi áskerı taqyryptaǵy materıaldarmen eshkimdi tańǵaldyra almaısyń, biraq bul jarıalanymdar men sújetter shynynda da qyzyq boldy", - dep atap ótti sol kezde QR QM-de.
"Jeńimpazdar" jobasyna arnalǵan ardagerlerdiń erlikteri týraly oqıǵalardy + 7-70-09-05-1945 WhatsApp arnaıy nómirine jiberýge bolady. Sújetti jibergen kezde ardagerdiń aty-jóni, týǵan kúni, týǵan jyly jáne týǵan jeri, ataǵy, áskerdegi tegi sıaqty tolyq málimetterin kórsetý kerek, sonymen qatar, birneshe sýret tirkeý qajet. Batyrlardyń jaqyndary saıtta anketa toltyra alady.
