Memleket Elbasynyń alǵa qoıǵan mindetterine sáıkes, sybaılas jemqorlyqqa qarsy is-qımyl salasyndaǵy memlekettik saıasatty iske asyrý boıynsha kezeń-kezeńmen, sapaly túrde jáne oılastyrylǵan sharalar qabyldanady. Bul rette barlyq kúsh jemqorlyqqa qarsy jáne onyń barlyq kórinisterine qarsy azamattar men memlekettiń múddelerin qorǵaýǵa baǵyttalǵan.
– Búgingi tańda Almaty oblysynda Ult josparyn júzege asyrý boıynsha birshama jumystar júrgizilýde. Ult josparyna sáıkes 3 kezeńnen turatyn baıqaýǵa memlekettik qyzmetke degen qyzyǵýshylyqtyń artqany belgili. Óıtkeni, qazaqstandyq memlekettik qyzmet saıasaty merıtokratıa qaǵıdasyna negizdelgen. Bul degenimiz – memlekettik qyzmetke kirý tómengi laýazymdardan bastalady jáne qyzmetshiniń jeke sińirgen eńbekteri men jetistikterine, onyń qabiletteri men kásibı daıarlyǵyna sáıkes memlekettik qyzmette odan ári joǵarylaı alady, – deıdi QR Memlekettik qyzmet isteri jáne sybaılas jemqorlyqqa qarsy is-qımyl Agenttiginiń Almaty oblysy boıynsha departamentiniń basshysy Serikbaı Nurǵısaev.
Jıynda sonymen qatar, Sybaılas jemqorlyqqa qarsy is-qımyl ulttyq búrosynyń Almaty oblysy boıynsha departament basshysynyń mindetin ýaqytsha atqarýshy D.M. Turǵanbaev departament boıynsha atqarylǵan isterge toqtalyp ótti.
– Aǵymdaǵy jyldyń ótken kezeńinde departmentpen 64 qylmystyq quqyq buzýshylyqtar tirkeldi, onyń ishinde 70%-dan astamy sybaılas jemqorlyqqa qatysty bolyp tabylady. Aıaqtalǵan qylmystyq ister boıynsha jalpy shyǵyn 99,4 mıllıon teńgeni qurap, 96 mıllıon teńgesi ótelindi. Sybaılas jemqorlyq qylmys úshin – 18 tulǵa, sonyń ishinde basshylar 4 tulǵa qylmystyq jaýapkershilikke tartyldy. Bul degenimiz kez-kelgen qyzmette otyrǵan adam úshin úlken sabaq bolady, – deıdi ol.
Búginde memlekettik qyzmetshiniń ádebi men minez-qulyq máselelerine úlken mán beriledi. Sondyqtan, jastar arasynda memlekettik qyzmettiń oń ımıjin qalyptastyrý, bolashaq memlekettik qyzmetshilerdiń pýlyn jasaqtaý, quqyqtyq memleketti odan ári damytý isinde belsendi jastardy tárbıeleý maqsatynda sybaılas jemqorlyqqa qarsy is-qımyl Agenttiginiń qoldaýymen İ.Jansúgirov atyndaǵy Jetisý memlekettik ýnıversıteti janynan «Jetisý» memlekettik qyzmet mektebi ashyldy. Onda bilimgerler tek dáris qana emes, tájirıbe de ala alady.
Jıyn sońynda QR Prezıdentiniń janyndaǵy memlekettik basqarý akademıasynyń Almaty oblysy boıynsha fılıalynyń dırektory Shakıshev Qazbek te 2018 jyldyń birinshi toqsanynda jergilikti atqarýshy organdar men ortalyq memlekettik organdardan 247 memlekettik tyńdaýshy oqýdan ótkeni jaıly aıtyp ótti.
