Mektep oqýshysy ata-anasynyń tamaqqa dep bergen aqshasynan únemdegen azdaǵan tiyn-tebenin kóshe boiynda qaiyr surap turǵan egde adamǵa berip jatqany belgisiz vidosy áleýmettik jelige tarap ketken bolatyn. Osylaisha quitaqandai qyzdyń qaiyrymdylyq áreketi jelide otyrǵan milliondaǵan adamnyń júregin eljiretkeni belgili.
Jergilikti jýrnalister Aqtaý qalasy bilim bóliminiń kómegimen qaiyrymdylyq jasaǵan qyzdy izdep taýyp onyń Aqtaý qalasyndaǵy №5 mekteptiń 2 synybynda oqityn Sabina esimdi qyz ekenin anyqtapty.
– Biz úlken otbasynda turamyz. Shańyraǵymyzda áke-sheshem jáne bes bala bar. Bizder kómekke muqtaj jandarmen qolymyzda barymyzben ylǵi bólisip turamyz. Sony qyzym kórip ósti. Ol vidioǵa túsip qalǵan sátinde kómekke zárý er adamǵa 70 teńge bergen aitty, – deidi Sabinanyń anasy Dinara Qarabalina.
Qaiyrymdy qyzdyń anasy Sabina planshet alýǵa aqsha jinap júrgenin de tilge tiek etken.
– Bizdiń úiimizde tiyn jinaityn arnaiy quty bar. Soǵan bárimiz múmkindiginshe tiyn-teben salyp turamyz. Ár aidyń sońynda qutyǵa jinalǵan aqshany kómekke muqtaj jandarǵa nemese meshitke aparyp beremiz, – deidi Dinara Qarabalina. Otbasynda osyndai tárbieni kórgen Sabinada kómekke muqtaj jandarǵa qol ushyn berýge daiar turady eken.
Óz kezeginde Sabina bilim alatyn №5 mekteptiń direktory Almajai Raiymberdieva Sabinanyń áreketi barsha balaǵa úlgi-ónege bolatynyn aitty.
