Jedel járdem brıgadasyn jalǵan aqparatpen ázildep shaqyrǵan Aqtaý turǵynyna aıyppul salyndy, dep habarlaıdy Dalanews.kz.
Mańǵystaý oblystyq jedel jáne shuǵyl medısınalyq járdem stansıasynyń baspasóz qyzmeti jaǵdaıdy baıandap berdi.
Oqıǵa 14 qazanda bolǵan. "103" púltine kóp dári-dármek qabyldaǵanyn aıtqan Aqtaý qalasynyń turǵynynan shaqyrtý kelgen.
“Jedel járdem barǵan kezde turǵyn "prank" uıymdastyrǵanyn jetkizdi”, – dedi medısınalyq mekemeniń baspasóz qyzmeti.
Osyǵan baılanysty shaqyrý QR ákimshilik quqyq buzýshylyq týraly kodekstiń 438-babyna sáıkes jalǵan bolyp tirkeldi. Arnaıy qyzmetterdi kórineý jalǵan shaqyrtqany úshin Aqtaý qalasynyń turǵynyna 80 000 teńge kóleminde aıyppul salyndy.
