Májilis depýtaty Nartai Aralbaiuly "qarǵyn sý qara shańyraǵyn aǵyzyp áketken aǵaiynnyń aryzyn" aitty. Onyń sózinshe, halyq topan sýdyń beti qaitqanda dalada qańǵyryp qalamyz ba dep qorqyp júr, - dep habarlaidy Dalanews.kz.
Depýtat Batys Qazaqstan oblysynda sý tasqynynan 1 292 turǵyn úige zaqym kelgenin málimdedi. Sonyń 116-sy Qaratóbe, 243-i Syrym, 218-i Bórli, 649-y Terekti, 43-i Báiterek, altaýy Tasqala aýdanynda, al 17 úi Oral qalasynda ornalasqan.
"Sý astynda qalǵan úidiń syz tartatyny, qabyrǵasy kógerip kópshilikti kúrkildegen jótelge dýshar qylatyny saraptamasyz-aq sanaly adam túsinetin dúnie. Batys Qazaqstan oblysyndaǵy taǵy bir kúrdeli ahýal saiajai máselesine qatysty. Derkól, Shaǵan jáne Jaiyq ózenderindegi sý deńgeiiniń kóterilýi saldarynan 14 839 saiajai ýchaskesin sý basqan. Onyń 14 466-sy Oral qalasynda, 112-si Báiterek, 245-i Bórli, 16-sy Terekti aýdandarynda ornalasqan. Ol jaqta myńdaǵan adam turady. Saiajai degeniń qazaq úshin demalys kúnderin ótkizetin emes, turaqty turatyn orynǵa ainalǵaly qashan. Sonyń ótemaqysyna qatysty túsinispestik áli toqtamai tur.
Óitkeni aǵyndy sýdyń astynda qalǵan saiajai iesine qansha aqsha beriledi nemese qashan, qai jerden basqa úi usynylady? Bul derekter ázirge ortalyqtandyrylmaǵan. Aqparat jurtqa jedel jetýi shart", - dedi ol.
Depýtat halyq qazir túsiniksiz kúide júrgenin málimdedi.
"Tasqyn sý tosynnan kelgende tosyp úlgermegen myńdaǵan qandas qazir BQO-da seń soqqan balyqtai eseńgirep qaldy. Olardyń ákimdikke baryp janaiqaiyn jetkizgenin dúiim jurt kórdi. Sondyqtan onsyzda qarǵyn sýdyń saldarynan qara shańyraqsyz qalǵan azamattardyń zańdy talaptaryn ýaqytyly oryndaýymyz qajet. Sebebi Memleket basshysy aitqandai "salaǵa jaýapty shendiler jaýapkershilik alýdan qashyp júrgende" el qaqaǵan qysta qatyp qalady", - dedi ol.
Aita keteiik, buǵan deiin depýtat Abzal Quspan sý tasqynynyń aldyn almaǵandar qatań jazalanýy kerek degen pikir bildirdi.
Depýtattyń aitýynsha, biylǵy sý tasqyny Qazaqstan táýelsizdik alǵaly onynshy iri sý tasqynyna jatady.
"Osy kezge de deiin sý tasqynynyń aldyn almaǵany nemese salǵyrttyq tanytyp, jol bergeni úshin eshbir joǵary laýazymdy tulǵa jaýapkershilikke tartylmaǵan. Bul jerde men jergilikti atqarýshy organnyń, iaǵni ákimderdiń jaýapkershiligi týraly aityp otyrmyn. Nege jergilikti atqarýshy organ? Óitkeni ózen boiyndaǵy sý jaiylmalarynan jer bergen, saiajailardy is júzinde turǵyn úige ainaldyrǵan, iaǵni jaryq, gaz tartyp, azamattardy turaqty tirkeýge ruqsat bergen, ol Úkimet emes, basqa emes, jergilikti atqarýshy organ, iaǵni ákimdikter. Al keltirilgen shyǵyndardy óteý salmaǵy árkez memleket moinyna artylady", - dedi ol.
Abzal Quspan biylǵy sý tasqynynda memleket te, azamattar da asa iri kólemde shyǵynǵa urynǵanyn málimdedi. Sondai-aq, depýtat BQO jáne Atyraý oblysyna aiaqtai barǵanyn, bul máselede tekseristi Bas prokýratýra deńgeiinde keshendi túrde uiymdastyrý qajet ekenin aitty.
