جاۋاپتى شەندىلەر قاشىپ جۇرگەندە ەل قاقاعان قىستا قاتىپ قالادى - نارتاي ارالباي ۇلى

ساعىنىش سارداروۆا 02 مام. 2024 17:15 2056

ءماجىلىس دەپۋتاتى نارتاي ارالباي ۇلى "قارعىن سۋ قارا شاڭىراعىن اعىزىپ اكەتكەن اعايىننىڭ ارىزىن" ايتتى. ونىڭ سوزىنشە، حالىق توپان سۋدىڭ بەتى قايتقاندا دالادا قاڭعىرىپ قالامىز با دەپ قورقىپ ءجۇر، - دەپ حابارلايدى Dalanews.kz.

دەپۋتات باتىس قازاقستان وبلىسىندا سۋ تاسقىنىنان 1 292 تۇرعىن ۇيگە زاقىم كەلگەنىن مالىمدەدى. سونىڭ 116-سى قاراتوبە، 243ء-ى سىرىم، 218ء-ى ءبورلى، 649-ى تەرەكتى، 43ء-ى بايتەرەك، التاۋى تاسقالا اۋدانىندا، ال 17 ءۇي ورال قالاسىندا ورنالاسقان.

"سۋ استىندا قالعان ءۇيدىڭ سىز تارتاتىنى، قابىرعاسى كوگەرىپ كوپشىلىكتى كۇركىلدەگەن جوتەلگە دۋشار قىلاتىنى ساراپتاماسىز-اق سانالى ادام تۇسىنەتىن دۇنيە. باتىس قازاقستان وبلىسىنداعى تاعى ءبىر كۇردەلى احۋال ساياجاي ماسەلەسىنە قاتىستى. دەركول، شاعان جانە جايىق وزەندەرىندەگى سۋ دەڭگەيىنىڭ كوتەرىلۋى سالدارىنان 14 839 ساياجاي ۋچاسكەسىن سۋ باسقان. ونىڭ 14 466-سى ورال قالاسىندا، 112ء-سى بايتەرەك، 245ء-ى ءبورلى، 16-سى تەرەكتى اۋداندارىندا ورنالاسقان. ول جاقتا مىڭداعان ادام تۇرادى. ساياجاي دەگەنىڭ قازاق ءۇشىن دەمالىس كۇندەرىن وتكىزەتىن ەمەس، تۇراقتى تۇراتىن ورىنعا اينالعالى قاشان. سونىڭ وتەماقىسىنا قاتىستى تۇسىنىسپەستىك ءالى توقتاماي تۇر.

ويتكەنى اعىندى سۋدىڭ استىندا قالعان ساياجاي يەسىنە قانشا اقشا بەرىلەدى نەمەسە قاشان، قاي جەردەن باسقا ءۇي ۇسىنىلادى؟ بۇل دەرەكتەر ازىرگە ورتالىقتاندىرىلماعان. اقپارات جۇرتقا جەدەل جەتۋى شارت"، - دەدى ول.

دەپۋتات حالىق ءقازىر تۇسىنىكسىز كۇيدە جۇرگەنىن مالىمدەدى.

"تاسقىن سۋ توسىننان كەلگەندە توسىپ ۇلگەرمەگەن مىڭداعان قانداس ءقازىر بقو-دا سەڭ سوققان بالىقتاي ەسەڭگىرەپ قالدى. ولاردىڭ اكىمدىككە بارىپ جانايقايىن جەتكىزگەنىن ءدۇيىم جۇرت كوردى. سوندىقتان ونسىزدا قارعىن سۋدىڭ سالدارىنان قارا شاڭىراقسىز قالعان ازاماتتاردىڭ زاڭدى تالاپتارىن ۋاقىتىلى ورىنداۋىمىز قاجەت. سەبەبى مەملەكەت باسشىسى ايتقانداي "سالاعا جاۋاپتى شەندىلەر جاۋاپكەرشىلىك الۋدان قاشىپ جۇرگەندە" ەل قاقاعان قىستا قاتىپ قالادى"، - دەدى ول. 

ايتا كەتەيىك، بۇعان دەيىن دەپۋتات ابزال قۇسپان سۋ تاسقىنىنىڭ الدىن الماعاندار قاتاڭ جازالانۋى كەرەك دەگەن پىكىر ءبىلدىردى.

دەپۋتاتتىڭ ايتۋىنشا، بيىلعى سۋ تاسقىنى قازاقستان تاۋەلسىزدىك العالى ونىنشى ءىرى سۋ تاسقىنىنا جاتادى.

"وسى كەزگە دە دەيىن سۋ تاسقىنىنىڭ الدىن الماعانى نەمەسە سالعىرتتىق تانىتىپ، جول بەرگەنى ءۇشىن ەشبىر جوعارى لاۋازىمدى تۇلعا جاۋاپكەرشىلىككە تارتىلماعان. بۇل جەردە مەن جەرگىلىكتى اتقارۋشى ورگاننىڭ، ياعني اكىمدەردىڭ جاۋاپكەرشىلىگى تۋرالى ايتىپ وتىرمىن. نەگە جەرگىلىكتى اتقارۋشى ورگان؟ ويتكەنى وزەن بويىنداعى سۋ جايىلمالارىنان جەر بەرگەن، ساياجايلاردى ءىس جۇزىندە تۇرعىن ۇيگە اينالدىرعان، ياعني جارىق، گاز تارتىپ، ازاماتتاردى تۇراقتى تىركەۋگە رۇقسات بەرگەن، ول ۇكىمەت ەمەس، باسقا ەمەس، جەرگىلىكتى اتقارۋشى ورگان، ياعني اكىمدىكتەر. ال كەلتىرىلگەن شىعىنداردى وتەۋ سالماعى اركەز مەملەكەت موينىنا ارتىلادى"، - دەدى ول.

ابزال قۇسپان بيىلعى سۋ تاسقىنىندا مەملەكەت تە، ازاماتتار دا اسا ءىرى كولەمدە شىعىنعا ۇرىنعانىن مالىمدەدى. سونداي-اق، دەپۋتات بقو جانە اتىراۋ وبلىسىنا اياقتاي بارعانىن، بۇل ماسەلەدە تەكسەرىستى باس پروكۋراتۋرا دەڭگەيىندە كەشەندى تۇردە ۇيىمداستىرۋ قاجەت ەكەنىن ايتتى.


ۇسىنىلعان
سوڭعى جاڭالىقتار