Almaty — eldegi eń jas ári qarqyndy damyp kele jatqan megapolis. Búginde qalanyń árbir úshinshi turǵyny – 14 pen 35 jas aralyǵyndaǵy jastar. Jas almatylyqtardyń jalpy sany 712,3 myńnan asady. Bul jai ǵana statistika emes – jastar qalanyń áleýmettik, mádeni jáne ekonomikalyq ómirine belsendi aralasyp keledi, dep habarlaidy Dalanews.kz.
Sońǵy úsh jylda júieli jastar saiasaty aiasynda Almatyda jańa býyndaǵy komiýniti-ortalyqtardyń keń jelisi quryldy. Bul – barlyq aýdanǵa taraǵan, jastardy qoldaýǵa baǵyttalǵan tolyqqandy infraqurylym. Munda 14 pen 35 jas aralyǵyndaǵy azamattar bilimge, kásibi damý men jumyspen qamtýǵa, áleýmettik jáne psihologiialyq kómekke qol jetkizip, belsendi qalalyq qaýymdastyqtyń bir bóligine ainalýda.
Jastarǵa arnalǵan júieli qoldaýdyń mańyzdy bóligi – Almaty qalalyq mansap ortalyǵy. Munda ýniversitetter men jumys berýshiler bir alańda biriktirilgen. 2025 jyldyń basynan beri bul ortalyq arqyly 4 myńnan astam jas maman jumysqa ornalasty.
Komiýniti-ortalyqtar – jańa formattaǵy keńistik.
Qazirgi ýaqytta Almatyda 11 komiýniti-ortalyq jumys isteidi. Bul – tek kovorkingter ǵana emes, jastar úshin ashyq ári qaýipsiz keńistik. Munda psihologiialyq jáne quqyqtyq kómek alýǵa, kásibi baǵdarlaýdan ótýge, sheberlik sabaqtaryna, intellektýaldy oiyndarǵa qatysýǵa bolady.
2025 jyldyń basynan beri:
- 6,2 myńnan astam adam jumyspen qamtý boiynsha keńes alǵan;
- 3,9 myń jas naqty jumysqa ornalasqan;
- 1 myńnan astam jas psihologiialyq kómek alǵan;
- 1,3 myńnan astam quqyqtyq keńes berilgen.
Ortalyqtarda keshendi tásil qoldanylýda: jastardy bastapqy diagnostikadan ótkizý, jeke damý marshrýttaryn qurý, oqytý, mentorlyq jáne ári qarai jumysqa ornalastyrý.
Komiýniti-ortalyqtarda ótkizilgen 1,6 myńnan astam is-shara 380 myńnan astam adamdy qamtydy. Áleýmettik jelilerdegi (Instagram, TikTok, Telegram t.b.) onlain-qamtý 1,5 millionnan asty. Jastar ekologiialyq, mádeni, bilim berý jáne volonterlik jobalarǵa belsendi qatysýda. Ár ortalyq óz aýdanynyń rýhyna sai komiýniti qalyptastyrýda.
NEET-sanatyna jatatyn jastarǵa erekshe kóńil bólinedi. Bul – jumys istemeitin, oqymaityn jáne oqýǵa tartylmaǵan jastar. Almatyda bul toppen de júieli jumys júrgizilýde.
Árbir komiýniti-ortalyq óz bastamalaryn damytady. Biri bilimge, biri kásipkerlikke, biri shyǵarmashylyqqa baǵyttalǵan. Osy arqyly Almatydaǵy ortalyqtar tek infraqurylym emes, naqty nátijege jeteleitin tiri ekojúiege ainaldy: munda jastar qoldaý tabady, damidy, birigedi, ideialaryn júzege asyryp, qaladaǵy ózgeristerdiń qozǵaýshy kúshine ainalady.
Bul model – búginde Qazaqstan boiynsha jastar saiasaty salasyndaǵy eń tabysty jobalardyń biri. Jyl sońyna deiin Almatyda taǵy eki jańa ortalyq ashý josparlanyp otyr.
