Túrkistan oblysy aýmaǵynda balalardyń jazǵy demalysyn paidaly ári qyzyqty ótkizý maqsatynda jazǵy lagerler qyzmet kórsetýde. Osy oraida, Saryaǵashta taǵy bir jazǵy lager balalar úshin esigin aiqara ashty, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
«Baldáýren» jazǵy saýyqtyrý lageriniń maýsymdyq ashylý saltanatyna qatysqan aýdan ákimi Arman Abdýllaev balalarǵa jazǵy demalysty qyzyqty ótkizýine tiliktestigin bildirdi.
– «Baldaýren» balalardy saýyqtyrý ortalyǵynyń maýsymdyq ashylýy qutty bolsyn! Balalar – bizdiń bolashaǵymyz, erteńimiz. Eldigimizdiń tiregi de osy jastardyń arasynda ósip keledi. Biz, eń aldymen, búldirshinderdiń balalyq shaǵynyń baqytty ótýine múmkindik jasaýymyz kerek. Qadirli balalar! Senderdiń jaqsy bilim alyp, jaqsy demalys ótkizýleriń úshin barlyq jaǵdai jasap jatyrmyz. Sender tek mektepte ozat qana emes, ata-analaryńnyń, eldiń maqtanyshy bolýlaryń kerek. Men senderge senemin! Jaqsy demalys bolsyn! – dedi aýdan basshysy.
Saltanatty shara elimizdiń Ánuranymen bastaldy. Balalar án aityp, bi bilep, óz ónerlerin kórsetti.
Aita keteiik, aýdan boiynsha jazǵy lagerlerge 2100-ǵa jýyq balaǵa joldama berý josparlanýda. Onyń ishinde, az qamtamasyz etilgen otbasynan 1160, kópbalaly otbasynan 800, tul jetim – 40, jartylai jetim – 50, úzdik 150 oqýshy bar. Jazǵy maýsymdyq demalý uzaqtyǵy – 10 kún. 11 maýsymynan bastap 23 tamyzǵa deiin 7 aýysymdy demalys josparlanýda. Atalǵan ortalyqta balalar is-shara josparyna sáikes demalady. Tańerteń tańǵy jattyǵýdan bastalyp, kúni boiy túrli úiirmeler, baiqaýlar, sporttyq jarystar, oiyndar men bi keshteri uiymdastyrylady. Sondai-aq, demalýshylar 5 mezgil ystyq tamaqpen qamtylady.
